رزاق سهتو

رزاق سهتو: سنڌي ٻوليءَ جو ناميارو ڪهاڻيڪار، ڊرامانگار ۽ اديب رزاق سهتو، پهرين اپريل 1962ع تي الهه وسائي سهتي جي گهر، ڳوٺ صوفاڻي، تعلقي ٺري ميرواهه، ضلعي خيرپورميرس ۾ جنم ورتو. شروعاتي تعليم پنهنجي ڳوٺ مان حاصل ڪرڻ بعد مئٽرڪ 1978ع ۾ ڪمپريهينسوِ هاءِ اسڪول خيرپورميرس مان، انٽر 1980ع ۾ ممتاز ڪاليج مان ۽ بي. ڪام 1984ع ۾ سنڌ يونيورسٽي، شاهه عبداللطيف ڪئمپس خيرپور ميرس مان ڪيائين.
عملي زندگيءَ جو آغاز 1984ع ۾ سنڌ ايمپلائيز سيڪيورٽيءَ کان ڪيائين، جنهن کان پوءِ 1986ع کان وٺي بئنڪ آف پاڪستان'>اسٽيٽ بئنڪ آف پاڪستان ۾ اهم عهدن تي فائز رهيو، جڏهن ته مختلف وقتن تي سنڌي ادبي سنگت ڪراچيءَ جي سيڪريٽريءَ جي عهدي تي به رهيو آهي.
رزاق سهتي لکڻ جي شروعات شاعريءَ کان ڪئي ۽ جلد ئي هن نثر ۾ لکڻ شروع ڪيو. سندس مضمون مختلف سنڌي اخبارن جهڙوڪ: روزاني عوامي آواز، جاڳو، هلال پاڪستان ۽ پڪار ۾ شايع ٿيندا رهيا. سندس لاڙو ڊرامن ڏانهن به رهيو آهي. سندس ڪيترا ڊراما مختلف سنڌي چئنلن تان نشر ٿي چڪا آهن، جن ۾ ڊرامه سيريل ’شام‘ ۽ آرٽ پلي ’سهارو‘ قابل ذڪر آهن، جڏهن ته هڪ اردو ٽيلي فلم ’اعلان‘ به لکي چڪو آهي.
سندس ڪهاڻين جو مجموعو ’اڌ وهي‘ 2001ع ۾ سيف پبليڪيشن، ڪراچيءَ پاران ڇپجي پڌرو ٿي چڪو آهي، جنهن ۾ شامل ڪهاڻي ’ڪارنهن‘ کي هاير ايجوڪيشن ڪميشن جي تيار ڪرايل ’سنڌي نصاب‘ ۾ پڻ شامل ڪيو ويو آهي، ۽ اهو ڪتاب سنڌ يونيورسٽيءَ ۾ به پڙهايو وڃي ٿو. رزاق سهتي کي ڪيترا اوارڊ ۽ اعزاز ملي چـڪـا آهن، جن ۾ سنڌ ڪلچرل ايسوسيئيشن اوارڊ (1993ع)، رشيد ڀٽي اوارڊ (1993ع)، سـنڌي ادبي سنگت سنڌ جو ’بهترين ڪهاڻيڪار‘ اوارڊ (1998ع)، محمد عثمان ڏيپلائي ايسوسيئيشن اوارڊ (1998ع) شامل آهن.

داخلا ۾ استعمال ٿيل تاريخون

1962.04.01  عيسوي

سنڌي ٻوليءَ جو ناميارو ڪهاڻيڪار، ڊرامانگار ۽ اديب رزاق سهتو، پهرين اپريل 1962ع تي الهه وسائي سهتي جي گهر، ڳوٺ صوفاڻي، تعلقي ٺري ميرواهه، ضلعي خيرپورميرس ۾ جنم ورتو.

اديب - ڀاڱي جون ٻِيون داخلائون