رشدالله شاهه امروٽي

رشدالله شاھہ امروٽي: سيد رشد ﷲ شاھہ ولد سيد منير احمد شاھہ امروٽي، 13 جنوري 1976ع تي امروٽ شريف ۾ جنم ورتو. هن جو تعلق نامور مذهبي عالم تاج محمود امروٽيءَ جي خاندان سان آهي. هن مئٽرڪ تائين تعليم امروٽ شريف ۾ حاصل ڪئي ۽ انٽر جو امتحان گورنمينٽ هائير سيڪنڊري اسڪول ڳڙهي ياسين مان پاس ڪيو. 1997ع ۾ شاھہ عبداللطيف يونيورسٽي خيرپور مان گرئجوئيشن ڪيائين. ديني تعليم ۾ هن ناظره قرآن مجيد جي تعليم درگاھہ عاليه قادريه راشديه امروٽ شريف ۾ حافظ ﷲ بخش وٽ ۽ فارسيءَ جي تعليم پنھنجي چاچي مولانا سيد سراج احمد شاھہ امروٽيءَ وٽ حاصل ڪئي، بعد ۾ درس نظاميءَ جي تعليم جامعہ دينيه دارالهديٰ حبيب آباد ٺيڙهيءَ مان حاصل ڪيائين. هن تخصص في الفقه الاسلاميءَ جي تعليم جامعہ حماديه مظهر العلوم منزل گاھہ سکر ۾ مولانا محمد مراد هاليجويءَ وٽ حاصل ڪئي. ٺيڙهيءَ ۾ تعليم حاصل ڪرڻ دوران مولانا سيد طاهر محمود شاھہ امروٽي، مولانا سراج الدين قاضي، مولانا شھاب الدين پهوڙ ۽ مولانا عبدالمطلب شر سندس هم سبق هئا، جڏهن تہ مظهر العلوم منزل گاھہ ۾ تعليم حاصل ڪرڻ دوران مولانا مفتي عبدالله مھر سندس هم سبقن ۾ شامل هو.
سيد رشد ﷲ شاھہ امروٽيءَ 1990ع کان باقاعدي لکڻ شروع ڪيـو. عـلـم جـي تـحـصيـل کانپوءِ هـن جـامـعـه حـمــاديه مـظـهـرالعـلوم منزل گاھہ سکر ۾ ڇھہ سال پڙهايو ۽ دارلافتاء يعني شعبه فتويٰ جو نگران رهيو. سيد رشدالله شاھہ امروٽيءَ سيد ’راشد امروٽيءَ‘ جي نالي سان شاعري پڻ ڪئي آهي. سندس ڪلام گهڻي ڀاڱي حمد، نعت ۽ اسلامي ۽ اصلاحي موضوعن تي مشتمل آهي. سندس ڪلام کي مشھور نعت خوان جھڙوڪ: امداد ﷲ ڦلپوٽو، سلطان احمد چنه، نعمت ﷲ سولنگي، انعام ﷲ مگسي ۽ راشد منگي ڳايو آهي. سيد رشد ﷲ شاھہ ڪجهہ مضمون پڻ لکيا آهن. ديني اصلاحي مئگزين ’ماهوار النصيحت سکر‘ ۾ سال 2005ع کان معاون ايڊيٽر آهي. هن ڪجهہ ڪتاب پڻ لکيا آهن، جيڪي شايع ٿي چڪا آهن، جـن ۾: (1) فـتـاويٰ مـحـمـد مـراد هــاليـجــوي (سنڌي: ترتيب 2002ع)، (2) مقالات محمد مراد هاليجوي (اردو: ترتيب 2002ع)، (3) نصيحت نامو (سنڌي: ترتيب 2003ع)، (4) تذڪير باالقرآن الڪريم (سنڌي: ترتيب 2005ع). اهي چارئي ڪتاب ’جامعہ حماديه مظهر العلوم‘ منزل گاھہ سکر طرفان ڇپجي چڪا آهن، جڏهن تہ سندس لکيل ٻہ ڪتاب: (1) حديث سيد الناصحين ۽ (2) سوانح حيات مولانا محمد مراد هاليجوي زير اشاعت آهن.

داخلا ۾ استعمال ٿيل تاريخون

1976.01.13  عيسوي

سيد رشد الله شاهه ولد سيد منير احمد شاهه امروٽي، 13 جنوري 1976ع تي امروٽ شريف ۾ جنم ورتو.

شخصيتون - ڀاڱي جون ٻِيون داخلائون