رفيق احمد مڱريو ڊاڪٽر

رفيق احمد مڱريو، ڊاڪٽر: عالم ۽ اديب ڊاڪٽر رفيق احمد مڱريو، 16 آڪٽوبر 1962ع تي ڳوٺ بازيدپور، ضلعي نوشهري فيروز ۾ ڄائو. پرائمري تعليم ڳوٺ مان ۽ مئٽرڪ 1978ع ۾ ڪنڊياري هاءِ اسڪول مان پاس ڪيائين. ان بعد چار سال مدرسة انوارالعلوم ڪنڊياري مان تجويد ۽ قرائت سان قرآن پاڪ جو حفظ ڪيائين. سنڌ يونيورسٽيءَ مان ايم. اي (اسلاميات) ۽ ايم. ايڊ ڪرڻ بعد ڪميشن جي امتحان ذريعي ليڪچرار مقرر ٿيو ۽ تحقيق جو ڪم جاري رکندي نامياري عالم ۽ محدث ’شيخ محمد حيات سنڌيءَ جي سوانح ۽ ديني خدمات‘ عنوان تي پي. ايڇ. ڊي مڪمل ڪيائين. 2005ع ۾ ٻيهر ڪميشن امتحان ذريعي اسسٽنٽ پروفيسر مقرر ٿيو.
ڊاڪٽر رفيق احمد مڱريي جا تحقيقي مضمون ۽ مقالا مختلف رسالن ۾ شايع ٿيندا رهيا آهن. سندس نانو آخوند تاج محمد خلافت تحريڪ ۽ ڪانگريس جو سرگرم اڳواڻ هو. رفيق احمد مڱريو مختلف مذهبي عالمن جون سوانح عمريون، ڪي تاريخي مضمون ۽ ڪتابن جا مقدما لکي چڪو آهي. سندس تصنيفن ۾:
(1) شرح اربعين ملا علي قاري (تحقيق)
(2) عيادت ڇو ۽ ڪهڙي طرح؟
(3) شيخ محمد حيات سنڌي: سوانح ۽ ديني خدمتون (پي. ايڇ. ڊي مقالو)
(4) مخدوم محمد عابد سيوهاڻي.
هن وقت مسلم سائنس ڪاليج حيدرآباد جي مخزن ’مسلم‘ جو چيف ايڊيٽر آهي.

داخلا ۾ استعمال ٿيل تاريخون

1962.10.16  عيسوي

عالم ۽ اديب ڊاڪٽر رفيق احمد مڱريو، 16 آڪٽوبر 1962ع تي ڳوٺ بازيدپور، ضلعي نوشهري فيروز ۾ ڄائو.

اديب - ڀاڱي جون ٻِيون داخلائون