رمضان نول

رمضان نول

رمضان نول

رمضان نول: نواجوان شاعر محمد رمضان نول، 20 جولاءِ 1961ع تي شهر موري، ضلعي نوشهري فيروز ۾ محمد موسيٰ نول جي گھر ۾ جنم ورتو. هن گريجوئيشن تائين موري شهر ۾ تعليم حاصل ڪئي، جنهن کان پوءِ سنڌ يونيورسٽيءَ مان 1984ع ۾ ايم. اي سياسيات ۾ ڪيائين. ڪراچيءَ ۾ نيويءَ ۾ اڪائونٽنٽ رهيو. مختلف شهرن ۾ نوڪري ڪرڻ سان گڏ هن جو ادبي تنظيمن سان تعلق پڻ رهيو. اسلام آباد ۾ نوڪريءَ دوران 1984ع کان 1985ع تائين سنڌ ڪلچرل آرگنائيزيشن جو نائب صدر رهيو. واهه ڪينٽ ۾ نوڪريءَ دوران 1985ع ۾ سنڌي ادبي سنگت جي شاخ قائم ڪيائين، جنهن جو 1986ع تائين جوائنٽ سيڪريٽري رهيو. ڪراچيءَ ۾ ملازمت دوران 1987ع کان 1988ع تائين سنڌي ادبي سنگت جو جوائنٽ سيڪرٽري ۽ پوءِ 1990ع تائين سيڪريٽري ٿي ڪم ڪيائين. ڪراچيءَ جي سنگت کي سرگرم ڪرڻ ۾ سندس اهم ڪردار رهيو.
رمضان نول لکڻ جي شروعات 1981ع کان شاعريءَ سان ڪئي. شاعريءَ ۾ پهرين تخليق وائي آهي، جيڪا 1983ع ۾ شايع ٿي. هن وقت تائين شاعريءَ ۾ غزل، وائي، نثري نظم تي طبع آزمائي ڪري چڪو آهي. هن شاعريءَ سان گڏ ڪجھه ڪهاڻيون ۽ ڪالم به لکيا. سندس شاعري ترقي پسند ۽ قومي خيالن سان گڏ سماج ۽ زندگيءَ جي مسئلن جي اپٽار تي مشتمل آهي، جنهن ۾ شهري دهشتگردي ۽ برده فروشيءَ جا اولڙا به نظر اچن ٿا. ان کانسواءِ ڪالم، مضمون ۽ ڪهاڻيون پڻ لکيائين. سندس شاعريءَ ۾ پسنديده صنف نثري نظم آهي. هن وقت تائين سـندس نثـري نظمن جا ٻه مجموعا’جھيڻي روشني جا نظم‘ (1993ع) ۽ ‘روح جا سجدا‘ (1999ع) شايع ٿي چڪا آهن. جڏهن ته هن جي غزل، وائي ۽ نظمن تي مشتمل ڪتاب ’درد جي ڇانوَ، ڪهاڻين جو ڪتاب ’سانت پڙاڏا‘ ۽ ڪالمن جو ڪتاب ’رخ بنا رستا‘ پڻ اڻ ڇپيل قلمي مسودن جي صورت ۾موجود آهن. هن جي شاعريءَ تي سنڌ جي وڏن شاعرن لڇمڻ ڪومل، واسديو موهي ۽ هدايت بلوچ جا اثرائتا مضمون ڇپيل آهن.
هن نوجوان شاعر دماغي رڳ ڦاٽڻ سبب ڪراچيءَ جي اسپتال ۾ 28 جولاءِ 2001ع تي وفات ڪئي، کيس موري ڀرسان اباڻي قبرستان ۾ دفن ڪيو ويو.

لفظ رمضان نولھيٺين داخلائن ۾ پڻ استعمال ٿيل آھي
جهيڻي روشنيءَ جا نظم (ڪتاب)
سنڌي شاعري 1
هن صفحي کي شيئر ڪريو

داخلا ۾ استعمال ٿيل تاريخون

1961.07.20  عيسوي

نواجوان شاعر محمد رمضان نول، 20 جولاءِ 1961ع تي شهر موري، ضلعي نوشهري فيروز ۾ محمد موسيٰ نول جي گھر ۾ جنم ورتو.


2001.07.28  عيسوي

هن نوجوان شاعر دماغي رڳ ڦاٽڻ سبب ڪراچيءَ جي اسپتال ۾ 28 جولاءِ 2001ع تي وفات ڪئي، کيس موري ڀرسان اباڻي قبرستان ۾ دفن ڪيو ويو.


شاعر - ڀاڱي جون ٻِيون داخلائون

عـبـدالله وريـاهه
شبنم موتي
وسيم سومرو
سليمان ڪورائي فقير
بدر قريشي
رفيق امروٽي
بدر شاهه
حبيب جالب
اسير ملاح
ڀيرجي ٺڪَر
شاعر ڀاڱي جا وڌيڪ مضمون