روهڙيءَ جي عيدگاھہ (ماڳ): هيءَ عيدگاھہ مغل دؤر جو اڏاوتي يادگار آهي. روهڙي شھر جي اولھہ ڏکڻ ۾ هڪ ٽڪري تي قائم هيءَ عيدگاھہ ٻن ايڪڙن تي محيط آهي. عيدگاھہ کي چئني طرفن کان احاطو ڏنل آهي. عيدگاھہ جي ديوار ٽن طرفن کان اُرھہ جيتري ۽ اولھہ طرف واري پاسي کان ڪجهہ وڏي آهي. ديوار جي وچ ۽ ٻنهي ڪنڊن تي ننڍا ننڍا گنبذ ٺهيل آهن. وچين گنبذ ۾ محراب نصب آهي. ان محراب جي ٻاهرين طرف کان ديوار ۾ هڪ سفيد پٿر لڳل آهي، جيڪو مير معصوم بکريءَ جو ڪتبو آهي. سنڌ جي قديم آثارن جي ڊائريڪٽريءَ جي مصنفن هن ماڳ جو دؤر 1004ھہ ڄاڻايو آهي.