رڪ سنڌي

رڪ سنڌي: نامور صحافي ۽ ليکڪ رُڪ سنڌيءَ جو اصل نالو غلام اصغر ولد غلام جعفر منگي آهي. سندس جنم 5 آگسٽ 1961ع تي ڳوٺ حامد اڄڻ، تعلقي ڪنڊياري، ضلعي نوشهري فيروز ۾ ٿيو. هن ابتدائي تعليم پنهنجي ڳوٺ مان؛ مئٽرڪ گورنمينٽ هاءِ اسڪول ڪنڊياري مان؛ انٽر گورنمينٽ ڊگري ڪاليج ڪنڊياري مان؛ بي. ايس. سي سنڌ يونيورسٽي ڄام شوري مان ڪئي. روزگار سانگي ڪراچيءَ ۾ رهائش پذير ٿيو. مختلف ادارن ۾ نوڪريءَ بعد مڪاني اداري ۾ يونين ڪائونسل سڪرنڊ ۾ ملازم ٿيو. جنهن بعد انسپيڪٽوريٽ آف سائنس جي چيف انسپيڪٽر جي آفيس ڪراچيءَ ۾ ملازم ٿيو، جتي 1999ع تائين نوڪري ڪيائين. رڪ سنڌيءَ 1990ع کان صحافت ۾ پير پاتو ۽ روزاني عوامي آواز ۾ سب ايڊيٽر ٿيو. جنهن بعد روزاني سنڌ سجاڳ، جاڳو ڪراچيءَ ۾ بحيثيت ايڊيٽر ۽ پبلشر ۽ روزاني سچ، روزاني سوڀ، روزاني تعمير سنڌ ۾ نيوز ايڊيٽر، اسسٽنٽ ايڊيٽر طور خدمتون سرانجام ڏنيون. رڪ سنڌي، مڙني سنڌي اخبارن ۽ رسالن ۾ سوين مضمون ۽ ڪالم لکيا آهن. سندس شايع ٿيل ڪتابن ۾: (1) قومون ۽ قومي تحريڪ آزادي، (2) ٽوڙهي ڦاٽڪ جو سـانحــو، (3) سنڌي قوم جو مـقـدمــو، (4) سنڌ جي سياسي صورتـحــال، (5) سنڌ آزاديءَ ۽ انقلاب، (6) تاريخ جي لاٽ، (7) قاضي فيض محمد، (8) ســنڌ جي قـومـي تـحـريـڪ ۾ سـنڌين جو اتحاد، (9) اڄ جي سنڌ، (10) سنڌو سڀيتا جي اوسر، (11) پاڪستان طوفان جي گهيري ۾ (بينظير ڀٽو جي ڪتاب جو سنڌي ترجمو)، (12) سنڌي ٻولي رت رتولي، (13) باباءِ سنڌ ڪامريڊ حيدر بخش جتوئي شايع ٿيل آهن.

داخلا ۾ استعمال ٿيل تاريخون

1961.08.05  عيسوي

صحافي ۽ ليکڪ رُڪ سنڌيءَ جو اصل نالو غلام اصغر ولد غلام جعفر منگي آهي. سندس جنم 5 آگسٽ 1961ع تي ڳوٺ حامد اڄڻ، تعلقي ڪنڊياري، ضلعي نوشهري فيروز ۾ ٿيو.

صحافي - ڀاڱي جون ٻِيون داخلائون