سانوڻ سنڌي

سانوڻ سنڌي

سانوڻ سنڌي

سانوڻ سنڌي: شاعر ’سانوڻ سنڌيءَ‘ جو اصل نالو به سانوڻ هو ۽ هُو مُکي کمون مل مينگهواڙ جي گهر ۾، 5 فبروري 1966ع تي، سيد محلي، ٽنڊي غلام عليءَ ۾ پيدا ٿيو. هن پرائمريءَ کان مئٽرڪ تائين پنهنجي شهر ۾ تعليم حاصل ڪئي. هاير سيڪنڊري اسڪول/ ڪاليج مان 1984ع ۾ انٽر ڪئي ۽ ان کانپوءِ بي. ايس. سي ۽ ايم اي سنڌيءَ جون ڊگريون گورنمينٽ ڊگري ڪاليج ٽنڊي محمد خان مان حاصل ڪيائين.
سانوڻ سنڌي، جونئير اسڪول ٽيچر ٿيو. ان کانپوءِ هن جي سائنس ٽيچر طور مقرري ٿي . سانوڻ سنڌي، پورهيت مائٽن جو محنتي اولاد هو. هن محنتي مزدوريءَ سان گڏ ايمانداريءَ سان ملازمت ڪئي. هن کي ننڍپڻ کان وٺي لکڻ پڙهڻ جو شوق هو ۽ 1983ع کان باقاعدي شاعري ڪيائين، جڏهن سنڌي ٻوليءَ جو ناميارو شاعر واجد سنڌي، ٽنڊي غلام عليءَ ۾ ملازم ٿي آيو ته سانوڻ سنڌي ۽ هن گڏجي صوفي شاهه عنايت شهيد اڀياس گهر قائم ڪيو، جنهن جي لائبرري آفيس ۾ هفتيوار ادبي گڏجاڻيون ٿينديون هيون. ادبي گڏجاڻين جي تنقيدي نشستن ۾ سانوڻ جي شاعري پختگي اختيار ڪئي. ان وقت مشڪور ڦلڪارو، غلام مصطفيٰ شاهين، عمر آريسر، نبي بخش ناز، سليم رضا ۽ ٻيا گڏجاڻين ۾ شريڪ ٿيندا هئا. اڳتي هلي صوفي شاهه عنايت شهيد اڀياس گهر، سنڌي ادبي سنگت ٽنڊي غلام عليءَ ۾ ضم ٿيو، تڏهن ڪهاڻيڪار جمن احمداڻي، اعجاز ڀٽي، امر سنڌي، رفيق لنڊ، مختيار سهتو ۽ جهانگير گل وغيره به گڏجاڻين ۾ اچڻ شروع ٿيا، ائين سانوڻ سنڌيءَ جي شاعري پختگي اختيار ڪندي وئي. هو سُٺو ڪمپيـئر به هو. مختلف پروگرامن جي ڪمپيئرنگ ڪيائين. سنڌي ادبي سنگت، ٽنڊي غلام عليءَ جي ترقيءَ ۾ سندس تمام وڏو هٿ هو. هن ڪهاڻيون ۽ مضمون به لکيا. سيپٽمبر 2002ع جي ڪينجهر رسـالـي ۾ سـندس ٽنڊي غلام عليءَ تي لکيل مضمون سڄيءَ سنڌ ۾ ٻيو نمبر حاصل ڪيو. سانوڻ سنڌي 37 سالن جي نوجوانيءَ واري عمر ۾4 جنوري 2003ع وفات ڪئي. سندس شاعريءَ جو هڪ ڪتاب ’ساوڻ آيو ساٺ ڪري‘ سنڌي ادبي سنگت، ٽنڊي غلام عليءَ پاران جنوري 2004ع ۾ سندس پهرين ورسيءَ تي ڇپجي پڌرو ٿيو.

لفظ سانوڻ سنڌيھيٺين داخلائن ۾ پڻ استعمال ٿيل آھي
سانوڻ سنڌي
هن صفحي کي شيئر ڪريو

داخلا ۾ استعمال ٿيل تاريخون

1966.02.05  عيسوي

شاعر ’سانوڻ سنڌيءَ‘ جو اصل نالو به سانوڻ هو ۽ هُو مُکي کمون مل مينگهواڙ جي گهر ۾، 5 فبروري 1966ع تي، سيد محلي، ٽنڊي غلام عليءَ ۾ پيدا ٿيو.


2003.01.04  عيسوي

سانوڻ سنڌي 37 سالن جي نوجوانيءَ واري عمر ۾4 جنوري 2003ع وفات ڪئي


شاعر - ڀاڱي جون ٻِيون داخلائون

حبدار سولنگي
ٺاڪرداس ڀاونداس تولاڻي ٺاڪر
ادريس عاجز عباسي
درياڻي هري دلگير
شمشير الحيدري
مخدوم محمد عارف سيوستاني 2
روشن تبسم
حيدر شاهه سيد
چانڊيو عاشق
رکيل شاهه
شاعر ڀاڱي جا وڌيڪ مضمون