ڊاڪٽر سريش ببلاڻي

سريش ببلاڻي، ڊاڪٽر: مشھور اديب، ليکڪ ۽ مترجم ڊاڪٽر ايس. (سريش) ببلاڻي، 11 آگسٽ 1962ع تي راجسٿان جي تاريخي شھر اجمير ۾ ڀاڳچند جي گهر پيدا ٿيو. M.com ڪرڻ کانپوءِ راجسٿان جي PWD کاتي ۾ ڪم ڪرڻ سان عملي زندگيءَ جي شروعات ڪئي. اجمير جي هري همٿاڻي، ڊاڪٽر ڪملا گوڪلاڻي ۽ ٻين مشھور سنڌي اديبن جون لکڻيون پڙهڻ کان پوءِ سنڌي ادب ڏانھن سندس لاڙو ٿيو. هن چونڊ سنڌي ادب جي ترجمن کان علاوه هڪ هندي رسالو ‘ساهتيه’ پڻ شايع ڪيو. کيس 1991ع ۾ نئين ٺھندڙ سنڌو سمِتي (ڪاميٽي) اجمير جو باني ۽ سيڪريٽري مقرر ڪيو ويو. 1995ع ۾ کيس ايجوڪيشنل بورڊ راجسٿان جو ڪنوينر مقرر ڪيو ويو. ساڳئي سال کيس راجسٿان جي وزارتي اسٽاف ڪائونسل جو صدر به چونڊيو ويو. ان کان علاوه نيشنل ڪائونسل آف پروموشن آف سنڌي لئنگئيج (NCPSL) ۽ راجسٿان سنڌي اڪيڊمي جو ميمبر پڻ رهيو. 2017ع ۾ مھارشي ديانند سرسوَتي يونيورسٽي اجمير پاران کيس ‘هري همٿاڻي جي ادب جو معاشي، سماجي ۽ ثقافتي جائزو’ جي موضوع تي Ph.D جي ڊگري ڏني وئي. سنڌي لوڪ ادب ۽ ٻين موضوعن تي لکيل سندس مقالا راجسٿان جي تعليمي نصاب ۾ پڻ شامل آهن. سندس لکيل ڪتابن ۾: ‘موهن جو دڙو’ (2007ع)، ‘سنڌو لوڪ ڪلا’ (2007ع)، ‘سنڌ جي صوفي پرمپرا’ (2007ع)، ‘ڏاجو’ (2007ع)، ‘هري همٿاڻي، شخص ۽ شخصيت’ (2016ع)، ‘افسانوي ادب جو معاشي، سماجي ۽ ثقافتي جائزو’ (2017ع)، ‘سنڌو، سنڌي سماجي ۽ ڪٿا ساهتيه’ (2017ع)، ‘غاليچي جا ٽڪرا’ (مختصر ناٽڪن جو مجموعو 2022ع)، ‘ناريل’ (مختصر ڪھاڻين جو مجموعو)، ‘16 ميل’ (تحقيقي مضمونن جو مجموعو، 2023ع)، ‘سنڌي ناٽڪ ’ (تحقيقي اڀياس – ٻه ڀاڱا 2023ع ۽ 2024ع) شامل آهن. ان کان علاوه سنڌيءَ مان هنديءَ ۾ به ڪجهه ڪتاب ترجمو ڪيا، جن ۾ : ‘وڀاجن ڪي ڪھانيان’ (ورهاڱي بابت ڪھاڻيون، 2000ع)، ‘آتما وشواس’ (ڪھاڻيون، 2004ع)، ‘گهر’ (هري همٿاڻي جي ڪھاڻين جو ترجمو، 2005ع)، ‘لائيف اسڪيچ آف سائين هرداس رام سائين جيل رام صاحب’ (2011ع)، ‘خاموش مسڪراهٽ’ (شاعري، ارجن حاسد، 2019ع) ۽ ‘آگ اڀي جل رهي هي’ (هري همٿاڻي جون ڪھاڻيون، 2020ع) شامل آهن. هنديءَ مان سنڌيءَ ۾ ترجمو ڪيل سندس ڪتابن ۾: ‘عڪس’ (ڪشميري مضمون، محمد جمن آزرده، 2018ع) ۽ ‘رنگ برنگو رنگ منچ’ (2022ع) شامل آهن. سندس ديوناگريءَ ۾ الٿو ڪيل ڪتابن ۾: ‘روپ مايا’ (نارايڻ شيام جا طويل نظم، 2010ع)، ‘ياد’ (هري همٿاڻي جون ڪھاڻيون، 2012ع)، ‘قديم سنڌي’ (سنڌ جي تاريخ، ڀيرومل مھرچند آڏواڻي، 2017ع)، ‘هيمليٽ’ (ناٽڪ، شيڪسپيئر، 2020ع) ۽ ‘ادبي آلاپ’ (ديپچند ڏيپلاڻي، 2020ع) شامل آهن.

داخلا ۾ استعمال ٿيل تاريخون

1962.08.11  عيسوي

مشھور اديب، ليکڪ ۽ مترجم ڊاڪٽر ايس. (سريش) ببلاڻي، 11 آگسٽ 1962ع تي راجسٿان جي تاريخي شھر اجمير ۾ سڀاڳچند جي گهر پيدا ٿيو.

اديب - ڀاڱي جون ٻِيون داخلائون