سهرابي محل (ماڳ): هيءَ عاليشان محل، خيرپور ميرس ۾ هو، جيڪو پوءِ سئنيما ۾ تبديل ڪيو ويو. خيرپور ۾ مير سهراب خان ۽ سندس اولاد جي رهڻ لاءِ هڪ عاليشان محل هو، جنهن ۾ ميرن جي ڏيڍين کانسواءِ هڪ ڪچهريءَ جو وڏو هال به هوندو هو، جتي عوام گڏ ٿيندو هو. اهو محل خيرپور شهر جي وچ ۾ هو، جتي سترهن شهزادا رهندا هئا، هن ئي محل تان مير سهراب خان 1830ع ۾ ڪري پيو ۽ دم ڏنو هئائين. اڄڪلهه ان جڳهه تي ٽالپر ٽاڪيز آهي. مير سهراب خان کان پوءِ مير رستم خان کي تعميراتي ڪم ڪرڻ لاءِ گهڻو موقعو نه مليو. سارو وقت محلاتي سازشن ۾ ڦاٿل رهيو. ان هوندي به سچل سرمست جو روضو ۽ رستم منزل سندس بهترين يادگار آهن.