سونو خان ملاح:

سونو خان ملاح: شاعر ۽ ڪهاڻيڪار سونو خان ملاح ولد خميسو خان ملاح، 23 مارچ 1956ع ۾ سڪرنڊ تعلقي جي ڳوٺ تليءَ ۾ پيدا ٿيو. هي هڪ هاريءَ جو پٽ هو. سنڌي ادبي سنگت سڪرنڊ جو بنيادي ميمبر هو. سٺو ڪهاڻيڪار ۽ شاعر هو. ڳوٺ ۽ علائقي جو سرگرم قومي ڪارڪن ۽ سماجي خدمتگار هو. پورهيت هو. هارپو ڪيائين، بورچي ٿيو، پٽيوالي ڪيائين. انٽر آرٽس ڪرڻ بعد زرعي ڪاليج سڪرنڊ ۾ ڪلرڪ ٿيو. پنهنجي دؤر جو مثالي قومي ڪارڪن هو. لابارن جي مند ۾ قومي ڪارڪنن سان گڏجي غريب هارين جي لابارن ۾ مدد ڪندو هو. مير محمد پيزادي، ولڻ ملاح ۽ تاج جويي جي صحبت ۾ ڪهاڻيون ۽ مضمون لکڻ ۽ شاعري ڪرڻ شروع ڪيائين. سندس ڪهاڻيون فقير محمد لاشاري، هلال مئگزين ۾ دلچسپيءَ سان شايع ڪندو هو، ڇاڪاڻ ته انهن ۾ پورهيت ڪردارن جي حقيقي عڪاسي ڪيل هوندي هئي. سنڌي ادبي سنگت سڪرنڊ کي سرگرم رکڻ ۾ سندس ڪردار وسارڻ جوڳو نه آهي. سندس شاعري، ڪهاڻين ۽ مضمونن جا ٻه ڪتاب ڇپائيءَ لاءِ تيار آهن.
تاج جويي پنهنجو ڪلاسيڪي شاعرن بابت ڇپايل پنهنجي هڪ ڪتاب ’باهيون بيراڳين جون‘ سوني خان ملاح کي هنن لفظن ۾ منسوب ڪيو آهي: ”شاهه لطيف جي جاکوڙي ڪردار، اورچ قومي ڪارڪن ۽ نوجوان اديب مرحوم سوني خان ملاح جي نانءِ، جنهن جي قومي جذبي، جدوجهد ۽ سچائيءَ مون ۾ قومي آجپي جي مقصد جو ويساهه ۽ اتساهه قائم رکيو آهي.“
مرحوم سوني خان ملاح کي هڪ پٽ عبدالجبار ملاح آهي. جڏهن ته سندس ڀاءُ ماڻڪ ملاح نوجوان شاعر، محقق ۽ سٺو نقاد آهي.
سخت پورهيي سبب بڪين جي بيماريءَ ۾ مبتلا ٿيڻ بعد سوني ملاح ۽ 28 جون 1982ع تي وفات ڪيائين.
مرحوم سوني خان ملاح جي مزار سڪرنڊ جي تاريخي قبرستان شهيد جيئو جنگ ۾ اوڀر ڪنڊ تي سندس والد مرحوم خميسي خان ملاح ۽ امڙ نور خاتون (نوران) جي قبرن جي وچ ۾ موجود آهي.

داخلا ۾ استعمال ٿيل تاريخون

1956.03.23  عيسوي

شاعر ۽ ڪهاڻيڪار سونو خان ملاح ولد خميسو خان ملاح، 23 مارچ 1956ع ۾ سڪرنڊ تعلقي جي ڳوٺ تليءَ ۾ پيدا ٿيو.

1982.06.28  عيسوي

سوني خان ملاح 28 جون 1982ع تي وفات ڪئي.

شاعر - ڀاڱي جون ٻِيون داخلائون