سيد جيئندل شاهه لڪياري

سيد جيئندل شاهه لڪياري: سيد جيئندل شاهه ولد سيد علي شاهه لڪياري، لڪياري سيدن جي ميان پوٽي پاڙي مان هو، جيڪي سيد غازي خان جي اولاد مان آهن، جنهن جو مقبرو شاهه صدر جي مقام ۾ ريلوي اسٽيشن لڪي شاهه صدر جي اولهه طرف آهي. سيد جيئندل شاهه 1900ع ۾ ڄائو. هن ابتدائي تعليم پنهنجي ڳوٺ آراضيءَ مان حاصل ڪئي، جيئندل شاهه وچولي درجي جو زميندار، صاحب فضل و ڪمال، راڄن ۾ رسوخ رکندڙ ۽ پنهنجي دور جو رڄ مڙس هو، وٽس وڏي ملڪيت نه هئي. مال جا وڳ هئس، گھوڙي سواريءَ جو شوقين هو. 1936ع ڌاري ضلعي لوڪلبورڊ دادوءَ جو ميمبر ۽ سيوهڻ ميونسپل جو صدر ٿيو. اصول پسند سياست جي ڪري ڪيترا دفعا جيل به ويو. سيد جيئندل شاهه همت ڀريو، بي ڊپو زميندار هو، هر ڪنهن کي منهن تي سچ چئي ڏيندو هو، هو قول توڙي فعل جو پڪو هو، سندس اوطاق تي سياستدانن، ڀاڳين، مهمانن ۽ راڄ وارن جا ميڙا متا پيا هوندا هئا، وڏو مهمان نواز ۽ سخي مرد هو. جي. ايم سيد جي ويجھن رفيقن مان هو، سائين جي. ايم سيد کي 1937ع، 1940ع ۽ 1953ع وارين چونڊن ۾ کٽرائڻ ۾ سيد جيئندل شاهه جون وڏيون ڪوششون هيون، ان وقت جي تر جا وڏيرا، زميندار، چڱا مڙس ۽ راڄ وارا سندس اثر هيٺ هئا، جيڪي سندس ٻانهن ٻيلي ٿي ڪم ڪندا هئا. 1945ع جي آخر ۾ جي. ايم سيد جا مسلم ليگ هاءِ ڪمانڊ سان اختلاف ٿيا، 1946ع جي آخر ۾ چوندون ٿيون، جن ۾ مسلم ليگ قاضي علي اڪبر کي بيهاريو، اليڪشن ۾ اسلام کي خطري جي نعري، مسلم ليگ جي مخالفت ۽ حڪومت جي مخالفت سبب ڪيترا ڏسڻا وائسڻا ماڻهو خوف ۽ لالچ کان متاثر ٿي ميدانن تان هٽي ويا. ان مخالفت واري طوفان ۾ جيئندل شاهه، جي. ايم سيد جو سهڪاري ٿي بيٺو. هن جي دل سنڌ ۽ سنڌين جي درد سان ڀريل هئي. کيس لالچون ڏنيون ويون، پر نه مڙيو، ان ڪري کيس ’فرنٽيئر ريگيوليشن ايڪٽ‘ هيٺ جيل موڪيلو ويو. اليڪشن وارو سمورو وقت دادو جيل ۾ رهيو. اليڪشن کانپوءِ کيس آزاد ڪيو ويو. وڏو بهادر انسان هو. سيد جيئندل شاهه کي ٽي پٽ ٿيا: (1) سيد غلام حسين شاهه،
(2) سيد ڪوڙل شاهه ۽ (3) سيد نظر علي شاهه. سندس پٽ ڪوڙل شاهه بي. اي، ايل. ايل. بي هو. ويجھي ماضيءَ ۾ سنڌ جي سياست ۾ اهم ڪردار ادا ڪيو ۽ جيل کاتي جو وزير ٿيو.
سيد جيئندل شاهه جي وفات 1980ع ڌاري ٿي.

شخصيتون - ڀاڱي جون ٻِيون داخلائون