سيد پير پنير شاهه جو مقبرو
سيد پير پنير شاهه جو مقبرو
سيد پير پنير شاهه جو مقبرو: پير شاهه جو مقبرو تعلقي گمبٽ، ضلعي خيرپورميرس ۾ آهي. سيد پير شاهه لاءِ مقامي طور تي مشهور آهي ته هيءُ اهل الله شخص ۽ بزرگ هو. هي بزرگ ملتان جي غوث بهاءُالحق ڏانهن کير موڪليندو هو، جيڪو لنگر طور درگاهه تي هلندو هو. هن لاءِ مشهور آهي ته هڪ ڀيري سواري جي مسئلي جي ڪري ملتان واري درگاهه ڏانهن کير نه پهچائي سگهيو ته سمورو چوپايو مال ئي غوث پاڪ ڏانهن موڪلي ڏنائين.
پير پنير شاهه جو مقبرو دڙي تي تعمير آهي. چؤڌاري کبڙن جا وڻ ۽ ڪجهه اڻڄاتل قبرون اٿس. مقبري کي ننڍڙو صحن آهي، جنهن کي چؤديوار ڏنل آهي. اڱڻ ۾ داخل ٿيڻ لاءِ ننڍو کليل لنگهه ٺهيل آهي، ڀت تي سيمنٽ جون ڄاريون هڻي خوبصورت ڪيو ويو آهي. اڱڻ ۾ پڪين سرن سان فرشبندي ٿيل آهي. مهاڙيءَ ۾ چؤڪنڊي ڪالم ۾ ونگائين لنگهه ۾ چؤڪاٺي سان ڪاٺ جو دروازو لڳل اٿس. پاسن کان نمائشي روشندان ٺاهي ڊزائين جو نمونو ٺاهيو ويو آهي. ٻنهي ڪنڊن تي ننڍن ٿنڀن مٿان نيلون هنيون ويون آهن. ڇت تي وڏو اٺڪنڊو ڳچ (Drum) ٺاهي ان تي سائي رنگ جو گنبذ رکيو ويو آهي. گنبذ جي چوٽي تي نيل پڻ نصب آهي. مقبري کي سفيد چوني جو رنگ ڪيل آهي، جڏهن ته گنبذ سائي رنگ جو اٿس. ڳچ جي ڪنڊن تي پڻ نيلون هنيل آهن. مقبري جي سنڀال چڱي ٿيل آهي. هتي پير پنير شاهه جا مريد حاضري ڀريندا رهن ٿا.