سُهائي ٽالپر

سُھائي ٽالپر: سُھائي ٽالپر، نامياري ڊاڪٽر ۽ اديب عزيز ٽالپر جي نياڻي آهي. هن ضلعي ٽنڊي محمد خان جي ڳوٺ ڀائي خان ٽالپر ۾، 23 سيپٽمبر 1987ع تي جنم ورتو. هيءَ خاندان جي پهرين عورت آهي، جنهن اعليٰ تعليم حاصل ڪري، 15000 اميدوارن ۾ سڀ کان وڌيڪ مارڪون حاصل ڪري، سي. ايس. سي جو امتحان پاس ڪيو آهي. اِن امتحان ۾، عورتن ۾ ٽيون نمبر اچي، سنڌ ۾ پوليس کاتي ۾ ٽين عورت اي. ايس. پي جو عهدو حاصل ڪيو آهي. هن نياڻيءَ جي ڪاميابيءَ ۾ سندس روشن خيال والد ڊاڪٽر عزيز ٽالپر ۽ والدہ غلام سڪينه ٽالپر جو وڏو هٿ آهي، جن زندگيءَ جي هر موڙ تي سندس همت افزائي ۽ رهنمائي ڪئي ۽ ڌيءَ کي اعليٰ تعليم ڏيارڻ وقت غلط ريتن رسمن ۽ سماجي رڪاوٽن جي ڪا بہ پرواھہ نہ ڪئي.
سھائي ٽالپر جو چوڻ آهي تہ کيس ابتدا کان وٺي پوليس ڊپارٽمينٽ ۾ اچڻ جو گهڻو شوق هو، ان ڪري هن CSS جو امتحان، پوليس ڊپارٽمينٽ ۾ اچڻ جي حوالي سان ڏنو. هوءَ سنڌي عورتن ۾ سنڌ جي ٽيون نمبر ۽ لاڙ جي علائقي توڙي ٽالپر خاندان جي پهرين عورت اي. ايس. پي مقرر ٿي آهي. پوليس ڊپارٽمينٽ ۾، عورتن جي اچڻ سان سنڌي سماج ۾ بهتري ايندي.
سھائي عزيز، پري اسڪول تعليم (نرسري) CBS ٽنڊي محمد خان ۾ حاصل ڪئي، پهرئين کان ٽيون درجو شاھہ لطيف اڪيڊمي ٽنڊي محمد خان ۾ پڙهي ۽ چوٿين کان نائين درجي تائين فوجي فائونڊيشن ٽنڊي محمد خان ۾ تعليم حاصل ڪئي، جڏهن تہ مئٽرڪ 2003ع ۾، انٽرميڊئيٽ 2005ع ۾ بحريه فائونڊيشن حيدرآباد مان پاس ڪيائين. بي. ڪام گورنمينٽ زبيدہ گرلس ڪاليج حيدرآباد مان پاس ڪرڻ کانپوءِ چارٽرڊ اڪائونٽنسي ماڊيول A ۽ B الحمد اڪيڊمي حيدرآباد مان ۽ ماڊيول C، SKANS اسلام آباد مان ڪيائين. ايم. اي اڪنامڪس 2011ع ۾ زبيدہ گرلس ڪاليج مان ڪيائين. سي. ايس. ايس. جي تياري ڪاميڪس اڪيڊمي حيدرآباد ۾ سيپٽمبر 2011ع ۾ ڪيائين ۽ 2012ع ۾ CSS جو ڪاميابيءَ سان امتحان پاس ڪري پوليس سروس پاڪستان ۾ اي. ايس. پي طور ڪاميابي ماڻيائين.
سھائي ٽالپر اسڪول ۽ ڪاليج دوران بھترين ڊبيٽر ۽ مقرر رهي آهي، ڪاليج جي شاگردياڻين جي چونڊن ۾ ڪامياب ٿي هيڊ گرل پڻ بڻي ۽ هميشہ پوزيشن هولڊر رهي.
سھائي ٽالپر، هاءِ اسڪول جي تعليم دوران ’سنڌي ٻالڪ تنظيم‘ ۾ سرگرم رهي چڪي آهي، جنهن پليٽفارم تان هن مختلف علمي ۽ ادبي تنظيمن جي ڪيترين تقريبن ۾ شرڪت ڪئي هئي.

داخلا ۾ استعمال ٿيل تاريخون

1987.09.23  عيسوي

سُهائي ٽالپر ضلعي ٽنڊي محمد خان جي ڳوٺ ڀائي خان ٽالپر ۾، 23 سيپٽمبر 1987ع تي جنم ورتو.

شخصيتون - ڀاڱي جون ٻِيون داخلائون