ڊاڪٽر شازيه پتافي

شازيه پتافي، ڊاڪٽر: محقق، قلمڪار ۽ استاد شازيه پتافي، 20 آگسٽ 1981ع تي ڳوٺ رسول بخش پتافي، تعلقي سوڀيديري، ضلعي خيرپور ميرس ۾، ديدار حسين پتافيءَ جي گهر جنم ورتو. هن 1996ع ۾ مئٽرڪ، 1998ع ۾ انٽرميڊئيٽ سوڀيديري مان ڪرڻ بعد 2003ع ۾ بي. اي (آنرس) ۽ ايم. اي (2004ع) ڪراچي يونيورسٽيءَ مان پهرين پوزيشن گولڊ ميڊل سان پاس ڪئي. 2006ع ۾ وفاقي اردو يونيورسٽيءَ ۽ 2009ع ۾ سنڌ يونيورسٽي ڄامشوري ۾ سنڌيءَ جي ليڪچرر مقرر ٿي. شازيه پتافي، سنڌي ٻولي ۽ ادب جي مختلف موضوعن تي ڪيترائي تحقيقي مقالا لکيا آهن، جيڪي ’ڪلاچي‘، ’نئين زندگي‘، ’سنڌي ٻولي‘، ’ڪينجهر‘ مخزنن ۾ ڇپجندا رهيا آهن. کيس نصابي سرگرمين عيوض مئٽرڪ ۾ اعزازي شيلڊ، بي. اي ۽ ايم. اي ۾ گولڊ ميڊل مليا آهن. سندس هڪ ڪتاب ’سنڌي ٻوليءَ ۾ گرامر نويسي جي ارتقا‘ سنڌي لئنگئيج اٿارٽيءَ 2009ع ۾ ڇپيو آهي. شازيه پتافي 2014ع ۾ ’شاھہ عبداللطيف ڀٽائيءَ جي شاعريءَ جو لسانياتي جائزو‘ جي عنوان تي ڪراچي يونيورسٽيءَ مان ڊاڪٽر فھميدہ حسين جي نگرانيءَ ۾ پي. ايڇ. ڊي ڪئي آهي. هن وقت سنڌ يونيورسٽيءَ ۾ سنڌي شعبي ۾ ليڪچرر آهي. شعبي مان نڪرندڙ ’ڪينجهر‘ رسالي جي سب ايڊيٽر آهي. هوءَ حيدرآباد ۾ رهي ٿي. تازو سندس شادي سفير احمد سان ٿي، جنهن مان کيس هڪ ٻار آهي.

داخلا ۾ استعمال ٿيل تاريخون

1981.08.20  عيسوي

محقق، قلمڪار ۽ استاد شازيه پتافي، 20 آگسٽ 1981ع تي ڳوٺ رسول بخش پتافي، تعلقي سوڀيديري، ضلعي خيرپور ميرس ۾، ديدار حسين پتافيءَ جي گهر جنم ورتو.

شخصيتون - ڀاڱي جون ٻِيون داخلائون