شان اداڪار

شان (اداڪار): پاڪستاني فلم انڊسٽريءَ جي نامور اداڪار، ليکڪ، ماڊل ۽ هدايتڪار، شان جو اصل نالو ارمغان شاهد آهي. سندس جنم 27 اپريل 1971ع تي لاهور ۾ ٿيو. سندس والد رياض شاهد، پاڪستاني فلمن جو ناليوارو هدايتڪار ۽ ماءُ نيلو پنهنجي وقت جي بهترين اداڪاره رهي. جڏهن ته سندس چاچو فياض شاهد پاڪستان ٽيليويزن جو ناميارو ڪئمرا مين ۽ پروڊيوسر هو.
شان، انٽر تائين تعليم پرسٽيجئس ائٽڪسن ڪاليج، لاهور مان حاصل ڪئي، جنهن دوران ‘الف نون’ نالي هڪ سيريل ۾ مزاحيه ڪردار ادا ڪيائين. ائٽڪسن مان تعليم مڪمل ڪرڻ بعد نيويارڪ، آمريڪا جي نيوٽن هاءِ اسڪول ۾ داخل ٿيو. جيتوڻيڪ ننڍپڻ ۾ کيس وڪيل ٿيڻ جو شوق هو ۽ اداڪاريءَ سان ڪا خاص دلچسپي نه هئس، پر ستن سالن بعد نيويارڪ مان واپس آيو ته پنهنجي فئملي بزنس رياض شاهد فلمز ۾ شامل ٿيو ۽ 19 سالن جي عمر ۾ پهرين فلم ‘بلندي’ ۾ مرڪزي هيري جو ڪردار ادا ڪيائين، جيڪو سندس سڃاڻپ بڻيو. سندس ٻين مشهور فلمن ۾ ‘سنگم’ (1997)، ‘نڪاح’ (1998)، ‘جنت ڪي مجاجن’ (2006)، ‘خدا ڪي ليي’ (2007)، ‘ظلِ شاهه’ (2009)، ‘جگني’ (2011) ۽ بلال لاشاريءَ جي هدايتڪاريءَ هيٺ ٺهيل فلم ۽ باڪس آفيس تي رڪارڊ بزنس ڪندڙ Waar (2013) کان سواءِ ‘شانِ عشق’ (2017) ۽ ‘ضرار’ (2017) شامل آهن. شان، هن وقت تائين بهترين اداڪار طور حڪومت پاڪستان طرفان پرائيڊ آف پرفارمنس اوارڊ (2007)، 15 نگار اوارڊ، 5 لڪس اسٽائيل اوارڊ، 4 نيشنل فلم اوارڊ ۽ 2011ع ۾ بيسٽ فلم هيرو طور پاڪستان ميڊيا اوارڊ حاصل ڪري چڪو آهي. هن آمنه نالي ڇوڪريءَ سان شادي ڪئي، جنهن مان کيس چئن ڌيئرن جو اولاد آهي.

داخلا ۾ استعمال ٿيل تاريخون

1971.04.27  عيسوي

پاڪستاني فلم انڊسٽريءَ جي نامور اداڪار، ليکڪ، ماڊل ۽ هدايتڪار، شان جو اصل نالو ارمغان شاهد آهي. سندس جنم 27 اپريل 1971ع تي لاهور ۾ ٿيو.

شخصيتون - ڀاڱي جون ٻِيون داخلائون