بخشل شاهاڻي

شاهاڻي، بخشل: موسيقار، ليکڪ ۽ استاد فقير بخشل شاهاڻي (بي. ڪي شاهاڻي)، 15 جولاءِ 1951ع تي تعلقي دادوءَ جي ڳوٺ موندر ۾، سومر خان شاهاڻيءَ جي گهر ۾ جنم ورتو. ايم. اي (سنڌي) ۽ ايم. ايڊ تائين تعليم حاصل ڪيائين. 1980ع کان لکڻ ۽ موسيقي ڏانهن لاڙو ٿيس، ننڍپڻ ۾ نعتون، سهرا ۽ عام ڪلام ڳائي دل وندرائيندو هو. 1970ع کان مختلف سازن: طبلي، هارمونيم ۽ ڍولڪ تي پنهنجي فن جو مظاهرو ڪرڻ سان گڏ ڳائڻ ۾ به مشغول رهيو. هن وقت سندس پٽ ‘ٻالڪ سنڌي’ پڻ موسيقيءَ جي دنيا ۾ مقبوليت ماڻي چڪو آهي. بخشل شاهاڻيءَ دادوءَ ۾ ‘استاد بخاري ميوزيڪل ڪلب’ قائم ڪري ٻالڪ سنڌيءَ سميت سرور سخيراڻي (مرحوم)، اعجاز منگي (ننڍڙو شمن)، ناهيد علي، ديدار علي شاهاڻي ۽ ٻين گلوڪارن جي فني تربيت ڪئي.
هن عملي زندگيءَ ۾ استاد طور خدمتون سر انجام ڏنيون. ڄامشوري منتقل ٿيڻ بعد ‘بي. ڪي شاهاڻي تعليمي مرڪز’ ۾ ٻارن کي مفت ٽيوشن به ڏنائين. 2011ع ۾ ڄام شوري جي سنڌ يونيورسٽي ايمپلائيز ڪوآپريٽو هائوسنگ سوسائٽيءَ واري هاير سيڪنڊري اسڪول مان 18 گريڊ ۾ رٽائر ڪيائين.
بخشل شاهاڻي 200 کان وڌيڪ گيتن ۽ غزلن جون ڌنون ترتيب ڏنيون آهن، جن مان اڪثر گيت سنڌي چئنلن تان نشر ٿيا. ليکڪ ۽ مرتب جي حيثيت سان سندس هيٺيان ڪتاب پڻ ڇپيا آهن: (1) سهڻا سخن (قول)، (2) انگريزي سنڌي ڊڪشنري، (3) انگلش گرامر، (4) ماڊرن پريڪٽس انگلش گرامر، (5) انگلش پوئٽري (ڪلاس نائون ۽ ڏهون)، (6) گهرو سگهڙائپ ۽ شفا بخش خوراڪ، (7) انگلش گائيڊس (ڇهين کان ٻارهين ڪلاس لاءِ) سنڌي ترجمو. بخشل شاهاڻيءَ، 4 آگسٽ 2014ع تي وفات ڪئي.

داخلا ۾ استعمال ٿيل تاريخون

1951.07.15  عيسوي

موسيقار، ليکڪ ۽ استاد فقير بخشل شاهاڻي (بي. ڪي شاهاڻي)، 15 جولاءِ 1951ع تي تعلقي دادوءَ جي ڳوٺ موندر ۾، سومر خان شاهاڻيءَ جي گهر ۾ جنم ورتو.

2014.08.04  عيسوي

بخشل شاهاڻيءَ، 4 آگسٽ 2014ع تي وفات ڪئي.

شخصيتون - ڀاڱي جون ٻِيون داخلائون