شاهه ولي الله جي تعليم
شاھہ ولي ﷲ جي تعليم
شاھہ ولي ﷲ جي تعليم (ڪتاب): هيءُ ڪتاب غلام حسين جلباڻيءَ جو تصنيف ڪيل آهي، جنهن ۾ شاھہ ولي ﷲ جي سوانح سان گڏ سندس تعليم ۽ تصنيفن بابت تفصيلي معلومات آهي. ڪتاب تفصيلي مقدمي کان سواءِ يارهن بابن تي مشتمل آهي. مقدمي کان پوءِ پهرين باب ۾ قرآن مجيد جي ڪيل فارسي ترجمي ۽ تفسير تي روشني وڌي وئي آهي. باب ٻئي ۾ حديث بابت جيڪي بہ سندس تصنيفون آهن، تن تي روشني وڌي وئي آهي. باب ٽئين ۾ فقھ بابت تصنيفن تي، باب چوٿين ۾ تصوف بابت تصنيفن تي، باب پنجين ۾ نبوت بابت سندس مڙني تصنيفن تي، باب ڇهين ۾ شريعت بابت سندس تصنيفن تي، باب ستين ۾ سياست بابت سندس مڙني تصنيفن تي، باب اٺين ۾ ارتفاقات بابت مڙني تصنيفن تي، باب نائين ۾ موت کان پوءِ جي حالتن بابت تصنيفن تي، باب ڏهين ۾ فلسفي بابت مڙني تصنيفن تي ۽ باب يارهين ۾ سندس ڪلام تي روشني وڌي وئي آهي.
پيش لفظ ۾ علامہ غلام مصطفيٰ قاسمي لکي ٿو ته، “زير نظر ڪتاب ‘ﷲ جي تعليم'>شاھہ ولي ﷲ جي تعليم’ کي منڍ کان وٺي پڇاڙي تائين هڪ نقاد جي حيثيت سان نظر مان ڪڍيم، جو نيٺ هن نتيجي تي پهتس تہ اهڙو مجموعو اڄ تائين سنڌيءَ کان سواءِ ڪنهن ٻي ٻوليءَ ۾ نہ ملندو. ان ۾ شاھہ صاحب جي نہ رڳو ڇاپي هيٺ آيل ڪتابن مان استفادہ ڪيو ويو آهي، پر اڻ ڇپيل نادر ڪتابن جو پڻ نچوڙ ڏنو ويو آهي ۽ ان سان گڏ هر ڳالھہ لاءِ سند پيش ڪئي وئي آهي، جنهنڪري شاھہ صاحب تي تحقيق ڪندڙن لاءِ هڪ وڏي سهولت پيدا ٿي پئي آهي.”
ڊبل ڪرائون سائيز ۾ 320 صفحن تي مشتمل هي ڪتاب سنڌ يونيورسٽي حيدرآباد طرفان 1961ع ۾ شايع ٿيو، جنهن جي قيمت 6 روپيا آهي.
لفظ شاھہ ولي ﷲ جي تعليمھيٺين داخلائن ۾ پڻ استعمال ٿيل آھي