شبانه سنڌي: سنڌ جي برک ليکڪا ۽ ڪهاڻيڪار شبانه سنڌيءَ جو جنم، 20 مارچ 1976ع تي ڳوٺ باجارا، تعلقي سيوهڻ، ضلعي ڄام شوري ۾ سيد عطا حسين شاھہ جي گهر ۾ ٿيو. تعليم جي حاصلات بعد تعليم کاتي ۾ پرائمري استاد مقرر ٿي. هن ادبي دنيا ۾ 1990ع ۾ پير پاتو. هن پهريان ڪيتريون ئي ڪهاڻيون فرضي نالي سان لکيون، بعد ۾ شبانه سنڌيءَ جي نالي سان ادب ۾ پير پاتائين. سندس پهرين ڪهاڻي ‘ڏک جنين جو ڏيج’ عورتن جي رسالي ‘بختاور’ ۾ ڇپي. هوءَ ڪيتري عرصي کان مسلسل ڪهاڻيون لکي رهي آهي. سندس ڪهاڻين جا ڪردار، سنڌي سماج جي انهن گهريلو ۽ معاشرتي مسئلن جا ترجمان آهن، جيڪي نئين دور مزاج ۽ ڌارين تهذيبن جي زير اثر آهن. سندس ڇپيل ڪتابن ۾ (1) ‘اداس سانجهي’ (ڪهاڻيون: 2001ع)، (2) ‘سپنو، ساڀيان ساڻ’ (ناوليٽ: 2005ع)، (3) ‘چنڊ، سمنڊ ۽ مان’ (شاعري: 2006ع) ۽ ‘ٻہ ناوليٽ’ (2011ع) قابل ذڪر آهن. کيس مڃتا طور سنڌي ساهت گهر، حيدرآباد طرفان ‘ڪينجهر ڪهاڻي اوارڊ’ (1997ع) ۽ سنڌي لئنگئيج اٿارٽيءَ طرفان 2011ع ۾ ‘ٻہ ناوليٽ’ ڪتاب تي ‘بھترين ناول’ جو اوارڊ ۽ 25 هزار روڪ رقم انعام طور مليا. شبانه سنڌيءَ جي شادي سيد منور علي شاھہ سان ٿيل آهي.
1976.03.20 عيسوي
سنڌ جي برک ليکڪا ۽ ڪهاڻيڪار شبانه سنڌيءَ جو جنم، 20 مارچ 1976ع تي ڳوٺ باجارا، تعلقي سيوهڻ، ضلعي ڄام شوري ۾ سيد عطا حسين شاهه جي گهر ۾ ٿيو.