شبير حسن گبول

شبير حسن گبول: شبير حسن جو اصل نالو شبير احمد ولد علي حسن گبول آهي. هو 17 فيبروري 1978ع تي ڳوٺ جاني گبول، تعلقي ڏهرڪي، ضلعي گهوٽڪيءَ ۾ پيدا ٿيو. هن بنيادي تعليم گورنمينٽ پرائمري اسڪول نٿو گبول ۽ گورنمينٽ برانچ مڊل اسڪول صاحب خان لنڊ مان پاس ڪئي. 1993ع ۾ مئٽرڪ گورنمينٽ هاءِ اسڪول جروار مان ۽ 1995ع ۾ انٽر سائنس گورنمينٽ ڊگري ڪاليج ميرپورماٿيلي مان پاس ڪيائين. هن 1997ع ۾ B.A، شاهه عبداللطيف يونيورسٽي خيرپور ميرس مان پاس ڪئي. هن 1998ع ۾ آبداري ڪورس وارو سرٽيفڪيٽ ايگزيڪيوٽو انجنيئر ڊويزن گهوٽڪي کان حاصل ڪيو. 1998ع ۾ ٽائيپ رائيٽنگ جي ڪورس وارو سرٽيفڪيٽ ۽ 2001ع ۾ C.T. علامه اقبال اوپن يونيورسٽي اسلام آباد مان ڪيائين. 2004ع ۾ ڪمپيوٽر ڪورس وارو سرٽيفڪيٽ ورتائين. هن 2003ع ۾ سرڪاري ملازمت حاصل ڪئي ۽ هن وقت SEPCO ڏهرڪي ۾ ڪم ڪري ٿو. هن ڪيترائي علمي ۽ ادبي مضمون مختلف اخبارن ۽ رسالن لاءِ لکيا آهن. هن شاعري پڻ ڪئي آهي. سندس شاعريءَ جو الڳ ڪتاب ڇپائيءَ هيٺ آهي. ان کان سواءِ هن ڊراما، خاڪا ۽ اسٽيج ناٽڪ لکيا آهن. سندس گهڻ رُخي سڃاڻپ ۾ اسٽيج اداڪاري به شامل آهي. ‘ڌرتي جا غدار’، ‘گهم ڦر ته هوا لڳئي’، ‘مارئي’، ‘حقيقت’، ‘گِدو بندر’، ‘عشق نه پڇي ذات’ ۽ ٻين کوڙ سارن اسٽيج ڊرامن ۾ اداڪاري ڪئي آهي. ڏهرڪي، اوٻاوڙو، ريتي، صادق آباد، گوهرآباد 8 نمبر، ڳوٺ جاني گبول، ميرپورماٿيلو، جروار، گهوٽڪي ۽ ڀرپاسي ۾ ٿيندڙ اسٽيج شوز ۾ حصو وٺندو رهيو آهي. ان کان سواءِ سنڌي چئنل ڪي ٽي اين جي ٽيلي فلم ڀڳت ڪنور رام ۽ 2013ع ۾ ڏهرڪيءَ ۾ تيار ٿيندڙ ٽيلي فلم ‘ٺڳن جو ڊان ’ ۾ پڻ پنهنجي اداڪاريءَ جا جوهر ڏيکاريا اٿس.
هي سچل سرمست ويلفيئر ۽ ڪلچرل سوسائٽي ڏهرڪيءَ سان لاڳاپيل آهي. سنڌي ادبي سنگت ڏهرڪيءَ جي ادبي ميڙاڪن ۾ نظر ايندو رهندو آهي. ‘تاريخ گبول بلوچ’ سندس اهم تصنيف آهي.

داخلا ۾ استعمال ٿيل تاريخون

1978.02.17  عيسوي

شبير حسن گبول 17 فيبروري 1978ع تي ڳوٺ جاني گبول، تعلقي ڏهرڪي، ضلعي گهوٽڪيءَ ۾ پيدا ٿيو.

شخصيتون - ڀاڱي جون ٻِيون داخلائون