پروفيسر شريف المجاهد

شريف المجاهد، پروفيسر: پاڪستان جو ناليوارو ليکڪ، مؤرخ ۽ عالم، پروفيسر شريف المجاهد، 1 جولاءِ 1926ع تي مدراس (گڏيل هندستان) ۾ پيدا ٿيو. ابتدائي تعليم حاصل ڪرڻ بعد 1949ع ڌاري مدراس يونيورسٽيءَ مان تاريخ جي شعبي ۾ بي. آنرز ۽ 1950ع ۾ ايم. اي (تاريخ) جي ڊگري حاصل ڪيائين. 1952ع ۾ اسٽئنفورڊ يونيورسٽيءَ مان صحافت ۾ ايم. اي جي ڊگري، 1959ع ۾ مئگل (Magil) يونيورسٽيءَ مان اسلاميات ۾ ايم. اي ۽ 70-1967ع ڌاري سيراڪيوز يونيورسٽيءَ جي صحافت شعبي مان پي. ايڇ. ڊي جي سند حاصل ڪيائين.
عملي صحافت جو آغاز 1945ع کان تحريڪ پاڪستان ۽ مسلمانن جي سياسي بيداري جهڙن موضوعن تي مضمون لکڻ سان ڪيائين. هندستان ۽ پاڪستان جي مختلف اخبارن ۽ رسالن جي ادارت ۾ شامل رهيو. ڪراچيءَ مان شايع ٿيندڙ سول ائنڊ ملٽري گزيٽ جو نمائندو رهيو. 1964ع کان 1969ع دوران مختلف وقتن تي ڏکڻ ايشيا جي تاريخ، سياست ۽ ايشيائي تهذيبن تي وزيٽنگ پروفيسر طور برئڊلي يونيورسٽي، اسٽيٽ يونيورسٽي، نيويارڪ ۽ اسٽيٽ يونيورسٽي ڪاليج، ڪورٽلئنڊ ۽ اوسويگو ۾ ليڪچر ڏنائين. 1955ع کان ڪراچي يونيورسٽيءَ جي صحافت واري شعبي جو باني ۽ اسسٽنٽ پروفيسر مقرر ٿيو، جتي پوءِ ترقي ڪندي ايسوسيئيٽ پروفيسر ۽ پوءِ پروفيسر ٿيو. 1976ع کان 1989ع تائين قائداعظم اڪيڊمي ڪراچيءَ جو باني ڊائريڪٽر ٿيو. 1990ع ۾ بين الاقوامي اسلامي يونيورسٽي، ملائيشيا ۾ صحافت جي شعبي جو بنياد رکيائين، جنهن جو پاڻ 1993ع تائين باني پروفيسر رهيو. ساڳئي سال (1993ع ۾) بين الاقوامي اسلامي يونيورسٽي اسلام آباد ۾ ‘تحقيق و تربيت’ شعبي جو ڊائريڪٽر مقرر ٿيو.
سندس شايع ٿيل تصنيفن ۾ ‘قائداعظم- ايڪ موضوعاتي مطالعه’ کي 1981ع کان هن وقت تائين قائداعظم جي سوانح تي ڇپيل بھترين ڪتاب جو اعزاز حاصل آهي، جنهن لاءِ کيس 2006ع ۾صدارتي اوارڊ سان نوازيو ويو. ان کان سواءِ مسلم ليگ جي دستاويزن تي مشتمل سندس ڪيترا ڪتاب ۽ تحقيقي رپورٽون شايع ٿيل آهن، جيڪي تاريخي دستاويزن جي حيثيت رکن ٿيون. سندس هڪ ڪتاب ‘انڊين سيڪيولرازم’ تمام گهڻو مقبول ٿيو، جنهن جو عربي ٻوليءَ ۾ ترجمو پڻ شايع ٿيو. سندس ٻيا ڪجهہ مقالا عربي، فرانسيسي، ملاوي، پورچوگيزي ۽ هسپانوي زبانن ۾ ترجمو ٿي چڪا آهن. هن بين الاقوامي ڪانفرنسن ۽ علائقائي سيمينارن ۾ 25 کان وڌيڪ تحقيقي مقالا پيش ڪيا آهن.
گذريل پنج ڏهاڪن کان تعليم ۽ تدريس جي ميدان ۾ سندس ڪيل خدمتن عيوض کيس 2001ع ۾ ‘اعزاز ڪمال/ فضيلت’ اوارڊ سان نوازيو ويو. ان کان سواءِ هاير ايجيوڪيشن ڪميشن پاڪستان طرفان ‘امتيازي قومي پروفيسر’ ۽ ڪراچي يونيورسٽيءَ پاران ‘فريڊم موومينٽ آرڪائيوز’ جي اعزازي ڊائريڪٽر جو اعزاز حاصل آهي.

داخلا ۾ استعمال ٿيل تاريخون

1926.07.01  عيسوي

پاڪستان جو ناليوارو ليکڪ، مؤرخ ۽ عالم، پروفيسر شريف المجاهد، 1 جولاءِ 1926ع تي مدراس (گڏيل هندستان) ۾ پيدا ٿيو.

عالم - ڀاڱي جون ٻِيون داخلائون