شمع سنڌي

شمع سنڌي: ٽي. وي ۽ اسٽيج جي مشهور اداڪاره شمع سنڌي،7 نومبر 1988ع تي وحدت ڪالوني حيدرآباد ۾ پيار علي جي گهر ۾ جنم ورتو. ابتدائي تعليم گورنمينٽ گرلس پرائمري اسڪول وحدت ڪالوني مان، مئٽرڪ 1999ع ۾ گورنمينٽ گرلس هاءِ اسڪول قـاســم آبـاد، انـٽــر 2001ع ۾ گورنمينٽ گرلس ڪاليج قاسم آباد مان پاس ڪيائين. فن جي دنيا ۾ 1997ع کان شروعات ڪيائين. کيس مزاحيه فنڪار ۽ ڊائريڪٽر منان عباسي (ماما لالو) ڪي. ٽي. اين تــان نـشــر ٿيـنـدڙ مـزاحيـه سيـريـل ‘ماما لالو‘’ ۾ متعارف ڪرايو. جنهن ۾ ‘راڌا باگڙياڻي’ جي ڪردار ذريعي سموري سنڌ ۾ سڃاڻپ ملي. هن فن جي سکيا، اداڪار ۽ ڊائريڪٽر يونس سنائيءَ کان حاصل ڪئي.
شمع سنڌي، سنڌ جي مختلف شهرن جي ميلن ملاکڙن ۽ اسٽيج تي 2000 کان وڌيڪ ڊرامن ۾ پنهنجي اداڪاري صلاحيتن جو مظاهرو ڪيو آهي. ان کان علاوه مهراڻ ٽي. وي تان مزاحيه پروگرام ‘رامون راڌا’، جيڪو 2 سال کان وڌيڪ عرصي تائين هليو، جنهن ۾ کيس تمام گهڻي پذيرائي حاصل ٿي. جنهن ۾ ‘رامون’ جو ڪردار مشهور اداڪار ۽ ڊائريڪٽر مرتضيٰ مجبور ادا ڪيو. سندس مشهور ڊرامن ۾ ‘ماما لالو’، ‘پٿر جا ماڻهو’، ‘پنهنجا پراوا’، ‘سوڀ’، ‘ڏوراپو’ کان سواءِ آدم سريلو جو لکيل ڊرامو ‘ٻڪرو نمبر ون’ ۽ حيات علي شاهه جو تحرير ڪيل ڊرامو ‘عيد جو وڳو’ پڻ شامل آهن. جيڪي 2014ع ۾ مهراڻ ٽي. وي تان عيد جي موقعي تي نشر ڪيا ويا. ان کان سواءِ هن ‘هوشو’ ۽ ‘هيمون’ نالي فلمن ۾ به اداڪاري ڪئي. کيس فني صلاحيتن جي عيوض سال 2005ع ۾ ڪي. ٽي. اين پاران ‘بيسٽ مزاحيه اداڪاره’ جو اوارڊ ڏنو ويو. ان کان سواءِ ٻيا ڪيترائي اوارڊ کيس مليل آهن. هي هن وقت حيدرآباد ۾ رهائش پذير آهي ۽ پنهنجو فني سفر جاري رکيو اچي.

داخلا ۾ استعمال ٿيل تاريخون

1988.11.07  عيسوي

ٽي. وي ۽ اسٽيج جي مشهور اداڪاره شمع سنڌي،7 نومبر 1988ع تي وحدت ڪالوني حيدرآباد ۾ پيار علي جي گهر ۾ جنم ورتو.

شخصيتون - ڀاڱي جون ٻِيون داخلائون