شهداد خان جو قبو

شهداد خان جو قبو (ماڳ): هي ماڳ ميان نور محمد جي قبرستان، ڳوٺ ميان نور محمد، تعلقي دولتپور، ضلعي شهيد بينظيرآباد ۾ واقع آهي. هن جي ڏکڻ ۾ اٽڪل هڪ ڪلوميٽر جي پنڌ تي نم جو ڳوٺ آهي ۽ هن جي اوڀر ۾ هڪ ڪلوميٽر جي پنڌ تي لنڊڪي ڪئنال وهي ٿو. مقيم ڏاهريءَ جو ڳوٺ اٽڪل 3 ڪلوميٽر اولهه ۾ ۽ موري جو شهر هتان کان 16 ڪلوميٽرن جي پنڌ تي آهي. هن مقبري جي ماپ ڊيگھه ۾ 7.90 ميٽر ۽ ويڪر ۾ 6.30 ميٽر ۽ اوچائيءَ ۾ 5.50 ميٽر آهي. رٿ ۾ هيءَ اڏاوت مستطيل آهي. اڏاوت مهل پڪيون سرون، گچ گارو ۽ چن استعمال ٿيل آهي. لنگھه اڀرندي طرف ونگن سان ٺهيل آهي. مهاڙيءَ جي مستطيل پانيلن تي مهندسي (Geometrical) ليڪون ۽ گهڻ راسيون ٺهيل آهن، چارئي پاسا هڪجهڙا سينگاريل آهن. ٻيڙ ٻنن تي ڪنگرن جا نشان موجود آهن، جڏهن ته هر ڪنڊ تي ڀڳل برجيون موجود آهن. ڇت تي گنبذ ڪونه آهي، پر محرابي ڇت (Vaulted roofing) آهي. هن اڏاوت (Anagonal Arch) جي چوٽيءَ تي ٿوري ٿوري وٿيءَ تي ڪوڻيءَ جا ابتا گل ۽ ان جي مٿان ڪلس ٺهيل آهن. هن قسم جي محرابي ڇت (Vaulted roof) جيڪب آباد ۾ عالم شاهه مسجد، نوابشاهه ۾ امير علي شاهه جو مقبرو، لاڙڪاڻي ۾ دائوءَ جا قبا ۽ دادوءَ ۾ ميان نصير محمد خان ڪلهوڙي جي قبرستان ۾ ڪن مقبرن تي به ملي ٿي. مقبري جو ٻاهريون حصو گچ گاري سان لتل آهي. اندر هر پاسي پانيلن تي اونها – گھڻ راسا ونگ ڏنل آهن. سواءِ اڀرندي ديوار ۾ لنگھه وٽ، جتي ٻن پانيلن تي اونهيون راسيون ٺهيل آهن. ائين چوڌاري پانيلن کان مٿي به سڌيون ۽ انگڙ ونگڙ گھڻ راسيون آهن. اندر ٻن قبرن تي گچ گاري جي لنب (Plaster) ٿيل آهي.

مقبرو - ڀاڱي جون ٻِيون داخلائون