سردار شوڪت حيات خان

شوڪت حيات خان، سردار: سياستدان، تحريڪ پاڪستان جي اڳواڻ، اٽڪ ۽ فتح جنگ ۾ ڪالا چٽا پهاڙ سان گڏ آباد کٽر قبيلي جي سردار شوڪت حيات خان 1915ع ڌاري جنم ورتو. هن ابتدائي تعليم امرتسر ۾ حاصل ڪئي. پوءِ عليڳڙهه ڪاليج ۾ داخلا ورتائين، ڪجھه عرصي بعد لاهور هليو ويو ۽ اتي 1935ع ۾ بي. اي ڪيائين. ان کانپوءِ ملٽري اڪيڊمي ديره دون ۾ فوجي تعليم ۽ تربيت حاصل ڪيائين ۽ ڪميشن ڏئي فوج ۾ شامل ٿيو. 1942ع ۾ ترقي ڪري ميجر ٿيو. ساڳئي سال فوج مان استعيفا ڏئي سياست ۾ حصو وٺڻ شروع ڪيائين. 1943ع ۾ خضر حيات خان ٽوانه جي ڪابينا ۾ وزير مقرر ٿيو. 1946ع ۾ وزارت کان الڳ ٿي مسلم ليگ ۾ شموليت اختيار ڪيائين ۽ پنجاب مسلم ليگ طرفان پارلياماني پارٽي جو ڊپٽي ليڊر مقرر ٿيو. تحريڪ پاڪستان جي عروج واري زماني ۾ ان ۾ اهم ڪردار ادا ڪيائين. پاڪستان ٺهڻ کانپوءِ نواب آف ڪالاباغ جي ڪابينا ۾ بحاليات ۽ ماليات جو وزير بڻيو، هڪ سال کانپوءِ اختلافن جي ڪري استعيفى ڏئي ڇڏيائين. 1964ع ۾ صدر ايوب خلاف فاطمه جناح کي ڪامياب ڪرائڻ لاءِ ڪونسل مسلم ليگ ۾ شامل ٿي ڪم ڪيائين. 1966ع ۾ تاشقند معاهدي خلاف مظاهرن ۾ حصو وٺڻ جي الزام ۾ گرفتار ڪيو ويو. ڪافي عرصو جيل ۾ گذارڻ کانپوءِ آزاد ڪيو ويو. 1970ع ۽ 1977ع جي عام چونڊن ۾ قومي اسيمبليءَ جو ميمبر چونڊيو ويو، ان وچ ۾ هي ڪجھه عرصو پاڪستان مسلم ليگ جو صدر پڻ رهيو. 10 نومبر 1976ع تي مسلم ليگ ڇڏي پاڪستان پيپلز پارٽيءَ ۾ شموليت اختيار ڪيائين. اپريل 1977ع ۾ کيس پارٽيءَ مان خارج ڪيو ويو، جنهن کانپوءِ آگسٽ 1977ع ۾ مسلم ليگ (پاڳارو گروپ)۾ شامل ٿيو ۽ ڪجھه عرصي بعد ان کي به ڇڏي ڏنائين.
هن 24 سيپٽمبر 1998ع تي وفات ڪئي.

داخلا ۾ استعمال ٿيل تاريخون

1976.11.10  عيسوي

سردار شوڪت حيات خان 10 نومبر 1976ع تي مسلم ليگ ڇڏي پاڪستان پيپلز پارٽيءَ ۾ شموليت اختيار ڪيائين.

1998.09.24  عيسوي

سردار شوڪت حيات خان 1915ع ڌاري جنم ورتو.هن 24 سيپٽمبر 1998ع تي وفات ڪئي.

شخصيتون - ڀاڱي جون ٻِيون داخلائون