شيخ، ثناءُ ﷲ: سماجي اڳواڻ ثناءُ ﷲ ولد قائم الدين شيخ، 4 جون 1927ع تي شڪارپور ۾ ڄائو. ننڍپڻ کان وٺي کيس تعليم جي حصول ۽ ادب سان گهڻو لڳاءُ هو. سندس خاندان جي علمي ذوق ۽ سماجي شعور هن ۾ ذهني جاڳرتا آندي. شڪارپور ۾ ‘مسلم اسٽوڊنٽس فيڊريشن’ جو سرگرم ڪارڪن ۽ ‘مولانا محمد علي جوهر لائبرريءَ’ جو انچارج رهيو. پرڏيهي ڪهاڻيون ترجمو ڪري شيخ اياز جي ادارت ۾ شايع ٿيل ماهوار رسالي ‘اڳتي قدم’ ۾ شايع ڪرايائين. 64-1963ع ۾ ‘سنڌي ادبي سنگت’ شاخ شڪارپور جو سيڪريٽري بہ رهيو.
ثناءُ ﷲ شيخ هن وقت سنڌ ۾ هڪ سٺي سماجي ڪارڪن جي حيثيت ۾ ڄاتو سڃاتو وڃي ٿو. ڪيترو عرصو سگا شڪارپور جو صدر ۽ شھر سڌار تنظيم جو سيڪريٽري بہ رهيو. هو ڪيترين سماجي تنظيمن جو باني ۽ سرپرست رهيو آهي. 1979ع کان ‘سنڌي ليکڪ يادگار ڪاميٽي شڪارپور’ جي سرپرست جي حيثيت سان خدمتون سرانجام ڏنائين. 1978ع ۾ تعليم کاتي مان اعليٰ عهدي تان رٽائر ٿيو ۽ هن وقت حيدرآباد ۾ رهي ٿو ۽ پنھنجي زندگي سماجي خدمتن ۾ گذاري رهيو آهي.
1927.06.04 عيسوي
سماجي اڳواڻ ثناءُ الله ولد قائم الدين شيخ، 4 جون 1927ع تي شڪارپور ۾ ڄائو.