شھباز شريف: پنجاب جي اڳوڻي وڏي وزير جو پورو نالو ميان محمد شھباز شريف آهي. هن 23 سيپٽمبر 1951ع تي لاهور ۾ جنم ورتو. سياست ۾ اچڻ کان اڳ هي پنھنجي والد محمد شريف سان گڏ ڪاروبار ۾ ٻانهن ٻيلي رهيو ۽ ‘اتفاق گروپ’ جي ترقيءَ ۾ ڪردار ادا ڪيو. شھباز شريف پهريون ڀيرو 1988ع ۾ اليڪشن ۾ ڪامياب ٿي پنجاب اسيمبليءَ جو ميمبر بڻيو، ان بعد هن 1990ع ۾ قومي اسيمبليءَ جي رڪنيت بہ حاصل ڪئي. ٻيهر 1993ع وارين چونڊن ۾ هي پنجاب اسيمبليءَ جو ميمبر چونڊجي آيو ۽ منظور وٽوءَ جي وڏ وزارت دوران هي مخالف ڌر جو اڳواڻ نامزد ٿيو.
1997ع واري اليڪشن ۾ شھباز شريف ڪاميابيءَ بعد پنجاب جو وزيراعليٰ منتخب ٿيو. مرڪز ۾ سندس وڏو ڀاءُ ميان نواز شريف وزيراعظم هو. اها اليڪشن تڏهوڪي صدر فاروق لغاريءَ پاران پ. پ حڪومت ۾ قائم اسيمبليون ٽوڙڻ بعد قائم ٿي هئي. جنهن ۾ مسلم ليگ (ن) قومي اسيمبليءَ جون 134 سيٽون حاصل ڪري مرڪز ۽ پنجاب ۾ حڪومت ٺاهي. ميان شھباز شريف مسلم ليگ (ن) جو صوبائي صدر پڻ رهيو.
2008ع وارين چونڊن بعد مرڪز ۽ ٽن صوبن ۾ پيپلز پارٽيءَ مخلوط حڪومت ٺاهي، جڏهن تہ پنجاب ۾ نواز ليگ کي سرسي ملي. شھباز شريف جيئن تہ پهريان ڪنهن قانوني رڪاوٽ سبب اليڪشن ۾ حصو نہ وٺي سگهيو هو ان ڪري سردار دوست محمد کوسي کي پنجاب جو وزير اعليٰ مقرر ڪيو ويو. ان بعد ضمني چونڊ ۾ PP-48 ڀڪر واري تڪ تان اميدوار کي استعيفا ڏياري، شھباز شريف پنجاب اسيمبليءَ جي ميمبرشپ حاصل ڪئي ۽ جون 2008ع ۾ وزيراعليٰ پنجاب منتخب ٿيو ۽ صوبي ۾ حڪومتي ڪارڪردگي مؤثر بڻائڻ لاءِ سرگرميءَ سان مصروف رهيو. هن پاڻ کي وزير اعليٰ بجاءِ ’خادم اعليٰ‘ سڏايو. فيبروري 2009ع ۾ سپريم ڪورٽ هڪ فيصلي ۾ شريف ڀائرن کي عوامي عهدن لاءِ نا اهل قرار ڏنو. جنهن بعد تڏهوڪي صدر آصف علي زرداريءَ پنجاب ۾ ٻن مهينن لاءِ گورنر راڄ لاڳو ڪيو. ان فيصلي بعد پ. پ ۽ نواز ليگ وچ ۾ سخت تنقيدي ڇڪتاڻ ٿي. ڇا ڪاڻ جو ان وقت جي گورنر سلمان تاثير (مرحوم) کي بہ نواز ليگ قبول نہ پئي ڪيو. بحال ٿيڻ بعد شھباز شريف ٻيهر حڪومتي ۽ سياسي معاملا هوشياريءَ سان هلايا ۽ صوبي ۾ تعليم ۽ ترقيءَ تي زور ڏنو.
2013ع وارين چونڊن بعد شھباز شريف ٽيون ڀيرو پنجاب جو وزيراعليٰ منتخب ٿيو آهي. پنھنجي پوئين حڪومت دور ۾ هن ڪيتريون ترقياتيون اسڪيمون ۽ پاليسيون متعارف ڪيون. غريبن لاءِ مفت تعليم جا ’دانش اسڪول‘ قائم ڪرڻ ’آشيانه هائوسنگ اسڪيم‘ تحت غريبن کي گهر ٺهرائي ڏيڻ، نوجوانن کي اسڪالرشپ ۽ ليپ ٽاپ فراهم ڪرڻ، پنجاب يوٿ انٽرنشپ ذريعي بي روزگار نوجوانن کي موقعا فراهم ڪرڻ ۽ ميٽرو بس سروس سميت مختلف اسڪيمون متعارف ڪيون آهن.
شھباز شريف پوئين دور حڪومت ۾ متحرڪ وزيراعليٰ رهيو آهي. هن 3 شاديون ڪيون، جن مان سندس 2 زالون وفات ڪري ويون. باقي ٽين گهرواري تھمينه دراني حال حيات آهي. شھباز شريف جي اولاد ۾ ٻہ پٽ حمزہ شهباز، سلمان ۽ ڌيءَ رابعہ عمران آهن.
1951.09.23 عيسوي
پنجاب جي اڳوڻي وڏي وزير شهباز شريف 23 سيپٽمبر 1951ع تي لاهور ۾ جنم ورتو.