طالب لوهار: لاڙ جي نامور سگهڙ طالب لوهار جو پورو نالو محمد طالب ولد محمد سومار لوهار هو. سندس جنم 1912ع ڌاري ڳوٺ اڊوڙي، تعلقي ٽنڊي باگي، ضلعي بدين ۾ ٿيو. ابتدائي قرآن مجيد ۽ فارسيءَ جي تعليم ’ٿوهي‘ جي مدرسي ۾ ميانجي محمد حسن عرف ميانجي ڏتل وٽان حاصل ڪئي. بعد ۾ ٽنڊي باگي ۾ مير غلام محمد ٽالپر جي مدرسي ۾ داخل ٿيو جتي سنڌي ٻوليءَ جي نامور شاعر استاد محمد صديق مسافر ۽ قادر بخش خاصخيلي وٽ تعليم حاصل ڪرڻ سان گڏ، انهن جي صحبت سبب علم ۽ ادب ڏانهن لاڙو ٿيو. 1934ع ۾ بمبئيءَ يونيورسٽي مان مئٽرڪ پاس ڪري پوليس ۾ ڀرتي ٿيو. پوليس ۾ دل نه لڳڻ سبب اها نوڪري ڇڏي، 1940ع ڌاري سوائل ڪلاسيفڪيشن (زمين جي مٿانهين جي چڪاس) کاتي ۾ ملازم مقرر ٿيو، جتي 1952ع تائين خدمتون سر انجام ڏنائين. 1944ع ۾ ٽنڊي باگي ۾ مستقل رهائش اختيار ڪيائين. 1952ع ۾ ڊاڪٽر نبي بخش خان بلوچ سان ملاقات ٿي، جنهن منجهس ٻوليءَ ۽ ادب سان لڳاءُ ۽ قابليت لوڪ ادب اسڪيم ۽ سنڌي لغت جي ڪم ۾ خدمت ڪرڻ لاءِ آڇ ڏني. جيڪا آڇ قبول ڪندي 1960ع تائين، انهي ڪم ۾ ذميواريون نڀايائين. علم ۽ ادب جي شوق کيس وڌيڪ پڙهڻ لاءِ اتساهيو. 1974ع ۾ بورڊ آف انٽر ميڊيٽ اينڊ سيڪنڊري ايجوڪيشن، حيدرآباد مان انٽر جو امتحان پاس ڪيائين. لوڪ ادب جي سهيڙ، دوران مشهور سگهڙ حاجي سرماڻ خان ڪرمتيءَ کان جلال کٽي ۽ سيد راڄن شاهه جا شعر ٻڌي کيس شاعري ڪرڻ جو شوق پيدا ٿيو. لوڪ ادب جي اسڪيم ڇڏڻ کان پوءِ ٽنڊي باگي ۾ عريضي نويس جو ڪم شروع ڪيائين، جتي شاعري کي مڪمل وقت پڻ ڏنائين. شاعريءَ جي ڪيترين ئي صنفن، هنر، رُباعي، غزل، مخمس، مسدس، مستزاد، بيت ۽ ڪافيءَ ۾ گهڻا شعر چيا. طالب لوهار 2 جون 1989ع تي وفات ڪئي. سندس شاعري جو ڪتاب ”پيرون چونڊيم پاند ۾“ 2012ع ۾ ڇپجي چڪو آهي.
1989.06.02 عيسوي
طالب لوهار جو پورو نالو محمد طالب ولد محمد سومار لوهار هو. سندس جنم 1912ع ڌاري ڳوٺ اڊوڙي، تعلقي ٽنڊي باگي، ضلعي بدين ۾ ٿيو. پاڻ 2 جون 1989ع تي وفات ڪئي.