طالب الله، مخدوم: هي مخدوم محمد معين ٺٽويءَ جو ڏاڏو ۽ مخدوم محمد اميين جو پيءُ هو. مخدوم طالب ﷲ بدين جو رهاڪو هو ۽ ذات جو دل لاکو هو. هي وڌي ڪرامت ۽ فضيلت وارو بزرگ هو. هن پنھنجي وڏي پٽ محمد کي پنھنجي پاران اورنگزيب عالمگير جي دربار ۾ موڪليو، جتان سندس پٽ محمد کي ڏھہ هزار ڌرم معاش لاءِ ۽ هڪ رپيو روزانو مدرسي جي خرچ لاءِ مقرر ٿي پروانو عطا ٿيو. اورنگزيب عالمگير جي خاص مقربن مان مير منشي فاضل خان، مخدوم طالب ﷲ جو خاص مريد هو. انهي ڪري مير منشي فاضل خان پنھنجي نياڻيءَ جو سڱ مخدوم طالب ﷲ جي پٽ مخدوم محمد امين کي ڏنو، مخدوم محمد اميين کي انهي گهرواريءَ مان پٽ جو اولاد ٿيو سندس اهو پٽ مخدوم محمد معين ٺٽويءَ جي نالي سان مشھور ٿيو. مخدوم طالب ﷲ وڏي عمر ۾ مغل گورنرن جي دؤر ۾ وفات ڪئي.