طور (سورت): طور قرآن مجيد جي ٻاونجاهين سورت آهي. هن ۾ ٻہ رڪوع ۽ اڻونجاھہ آيتون آهن. هي سورت مڪي شريف ۾ ان وقت نازل ٿي، جڏهن حضور ڪريم صلي ﷲ عليہ وسلم جن تي الزامن ۽ اعتراضن جو وسڪارو هلي رهيو هو. هن سورت ۾ طور جبل جو ذڪر آيو آهي، جنهن جي نسبت حضرت موسى عليہ السلام سان آهي. ان ڪري هن سورت جو نالو طور پئجي ويو. سورت جي شروعات ۾ ٻڌا يو ويو آهي تہ: جهڙيءَ ريت حضرت موسى عليہ السلام تي طور جبل مٿان وحي لاٿي وئي هئي ۽ ان جي مخالفت ڪندڙن جو جيڪو حشر ٿيو هو، جيڪڏهن قريش ڪافر بہ انهن وانگر حضور نبي ڪريم صلي ﷲ عليہ وسلم جن جي مخالفت ڪرڻ کان نہ مڙيا تہ انهن جو حشر بہ تباهي ۽ بربادي هوندو ۽ پاڻ ڪريمن صلي ﷲ عليہ وسلم جن کي هدايت ڪئي وئي تہ حق جي مخالفن جي پرواھہ ڪرڻ کانسواءِ پنھنجي دعوت ماڻهن تائين پهچائيندا رهن، آخري آيتن ۾ ٻڌايو ويو آهي تہ تڪليفن ۽ بندشن جو صبر ۽ استقلال سان مقابلو ڪندا هلندا رهو، ايستائين جو ﷲ تعالى جو فيصلو نہ اچي ۽ ان (ﷲ) توهان کي اڪيلو نہ ڇڏيو آهي، بلڪہ لڳاتار توهان جي نگهباني ڪري رهيو آهي، جيستائين فيصلي جي گهڙي نہ اچي تيستائين سڀ ڪجهہ سهندا ۽ هلندا رهو. هيءَ ئي اها ڳالھہ آهي جا اهڙين حالتن ۾ دين جي ڪم ڪندڙ کي درڪار هوندي آهي.