عبدالرزاق قاضي، مولانا: عالم، اديب ۽ صحافي، مولانا قاضي عبدالرزاق، 18 سيپٽمبر 1892ع تي روهڙيءَ ۾ جنم ورتو. ابتدائي تعليم روهڙيءَ جي اسڪول ۽ مدرسي مان حاصل ڪيائين. 1905ع ڌاري ناز هاءِ اسڪول خيرپور ميرس ۾ داخل ٿيو، جتان پوءِ 1908ع ۾ سنڌ مدرسي ڪراچيءَ ۾ داخلا ورتائين. جتان 1912ع ۾ مئٽرڪ پاس ڪيائين، جنهن بعد ڪراچيءَ جي خالقڏني هال ۾ مولانا عبيدالله سنڌيءَ جي تقرير ٻڌڻ جو موقعو مليس. مولانا جي تقرير کان متاثر ٿي وڌيڪ انگريزي پڙهڻ ڇڏي، پير جهنڊي جي ‘دارالرشاد’ مدرسي ۾ داخل ٿيو. ان بعد لاهور ويو، جتي مولانا احمد علي لاهوريءَ وٽ سال تائين پڙهيو. 1916ع ۾ واپس روهڙيءَ آيو، جتي ضلعي لوڪل بورڊ جي مسلم بورڊنگ هائوس سکر ۾ استاد مقرر ٿيو. 1918ع ۾ سنڌ مدرسي ڪراچيءَ ۾ عربيءَ جو استاد مقرر ٿيو، جتي 1936ع تائين رهيو. علامہ عمر بن محمد دائودپوٽو پڻ وٽس پڙهيو. سنڌ مدرسي ۾ رهڻ دوران 1930ع ڌاري ‘علمي دنيا ’ نالي هڪ ماهوار رسالو جاري ڪيائين. ڪجهہ عرصي بعد ‘ڪاميابي’ نالي سان رسالو جاري ڪيائين. 1936ع ۾ ‘الوحيد’ اخبار ۾ نائب ايڊيٽر ٿيو. ان سال سنڌ جي بمبئيءَ کان ڌار ٿيڻ تي ‘سنڌ آزاد نمبر’ جاري ڪيائين. 1939ع ۾ ٻيهر سنڌ مدرسي ۾ عربيءَ لاءِ استاد مقرر ٿيو، جتي 1949ع تائين رهيو. جنهن بعد علامہ عمر بن محمد دائودپوٽي جي آڇ تي اين. جي. وي هاءِ اسڪول ڪراچيءَ ۾ عربي ٽيچر مقرر ٿيو، جتان 1957ع ۾ ملازمت ڇڏي تصنيف جي ڪم ۾ مشغول ٿي ويو. هن ڪيترائي ڪتاب لکيا. قرآن مجيد جو تفسير، ديني ۽ اصلاحي ڪتابن سيمت ٻين موضوعن تي ڪل 23 ڪتاب لکيا. مولانا قاضي عبدالرزاق، 19 مئي 1961ع تي وفات ڪئي.
1892.09.18 عيسوي
مولانا قاضي عبدالرزاق، 18 سيپٽمبر 1892ع تي روهڙيءَ ۾ جنم ورتو.
1961.05.19 عيسوي
مولانا قاضي عبدالرزاق، 19 مئي 1961ع تي وفات ڪئي.