عبدالفتاح ميمڻ 1: اڳوڻو سفير ۽ نامور سياستدان عبدالفتاح ولد حاجي ولي محمد ميمڻ، 21 آڪٽوبر 1920ع تي شڪارپور شهر ۾ پيدا ٿيو. ابتدائي تعليم پرائمري اسڪول شڪارپور مان، مئٽرڪ 1937ع ۾ هوپفل اڪيڊميءَ مان، بي. اي ۽ ايل. ايل. بي بمبئيءَ مان 1942ع ۾ ڪيائين. تعليم مڪمل ڪرڻ بعد ساڳئي سال لاڙڪاڻي شهر ۾ مستقل رهائش اختيار ڪري فوجداري ۽ سول شعبي ۾ وڪالت شروع ڪيائين. هن جون تعليم لاءِ ڪيتريون ئي خدمتون آهن. عبدالفتاح ميمڻ ‘تحريڪ پاڪستان’ ۽ مسلم ليگ جو سرگرم ڪارڪن ۽ اڳواڻ رهيو. هيءُ لاڙڪاڻي شهر لاءِ مسلم ليگ جو 1947ع ۾ جنرل سيڪريٽري، 1948ع ۾ ضلعي جنرل سيڪريٽري، 1950ع ۾ سنڌ جو جنرل سيڪريٽري، 1946ع کان 1948ع تائين، آل پاڪستان مسلم ليگ ڪانفرنس جو جنرل سيڪريٽري رهيو. 1952ع ۾ وارهه تعلقي مان مقامي وڏيري حاجي خان ڪلهوڙي کي شڪست ڏئي سنڌ ليجسليٽو اسيمبليءَ جو ميمبر چونڊيو. 1950ع ۾ پاڪستان ريڊ ڪراس جو ميمبر، 1953ع ۾ نارٿ ريلوي ايڊوائيزري بورڊ جو ميمبر، سنڌ مسلم لا ڪاليج ڪراچيءَ ۾ 1981ع ۾ بين الاقوامي قانون جو اعزازي پروفيسر، 1980ع کان 1990ع تائين ايل ايل ايم ۽ اسلامڪ قانون پڙهائڻ لاءِ اعزازي پروفيسر ٿي رهيو. 1953ع ۾ وزيراعظم خواجه نظام الدين پاران کيس مسلم ليگ ورڪنگ ڪميٽيءَ تي مقرر ڪيو ويو، جتي 1958ع تائين خدمتون سرانجام ڏنائين. پاڻ 1955ع ۾ اقوام متحده جي ڏهين اجلاس ۾ پاڪستاني وفد جو ميمبر رهيو. عبدالفتاح لاڙڪاڻو ڪوآپريٽو ڪاليج ايجوڪيشن سوسائٽي لميٽڊ جو بنياد رکيو، ۽ 1954ع کان 1963ع تائين جنرل سيڪريٽري رهيو، جنهن جي پليٽ فارم تان لاڙڪاڻو آرٽس ڪاليج، ڪامرس ڪاليج ۽ لا ڪاليج قائم ڪرايائين. 1962ع وارين چونڊن ۾ ذوالفقار علي ڀُٽي خلاف اليڪشن وڙهڻ لاءِ فارم ڀرايو. هيءُ 1963ع کان 1967ع تائين پاڪستان حڪومت طرفان سعودي عرب لاءِ سفير مقرر ٿيو. اتان واپسيءَ بعد ڪراچيءَ ۾ رهائش اختيار ڪيائين ۽ ايس. ايم. لا ڪاليج ۾ پڙهائڻ سان گڏ وڪالت به ڪرڻ لڳو. هيءُ حڪومت طرفان ولي خان ڪيس جي خاص ٽربيونل جو 1973ع ۾ ميمبر هو. عبدالفتاح ڪيترن ئي ملڪن جو سفر پڻ ڪيو، جن ۾: فرانس، انگلنڊ، آمريڪا، سعودي عرب وغيره قابل ذڪر آهن. سندس انگريزيءَ ۾ چار ڪتاب شايع ٿيل آهن، جن ۾ آئل اينڊ فيٿ (1966ع)، انويٽيشن ٽو نيو سوسائٽي (1968ع)، ڪانسيپٽ آف پراونشل ائٽانامي اينڊ پاڪستان (1968ع) ۽ ڪانسٽيٽيوشن اينڊ قرآن (1968ع) قابل ذڪر آهن. کيس چئن پٽن ۽ هڪ ڌيءُ جو اولاد ٿيو. هن 31 جنوري 2002ع تي وفات ڪئي.
1920.10.21 عيسوي
اڳوڻو سفير ۽ نامور سياستدان عبدالفتاح ولد حاجي ولي محمد ميمڻ، 21 آڪٽوبر 1920ع تي شڪارپور شهر ۾ پيدا ٿيو.
2002.01.31 عيسوي
نامور سياستدان عبدالفتاح 31 جنوري 2002ع تي وفات ڪئي.