عبدالفتاح ميمڻ

عبدالفتاح ميمڻ 2: نامور سياستدان عبدالفتاح ميمڻ، 31 جولاءِ 1932ع ۾ شھر ڀريا، ضلعي نوشهري فيروز ۾ علي نواز ميمڻ جي گهر ۾ جنم ورتو. مئٽرڪ هاءِ اسڪول لاڙڪاڻي مان ۽ انٽر مسلم ڪاليج ڪراچيءَ مان ڪيائين. ڪراچيءَ مان گريجوئيشن ڪرڻ کانپوءِ 1957ع ۾ سـنـڌ مـسلـم لا ڪـالـيـج ڪـراچـيءَ مـان وڪالت پاس ڪيائين. تعليم مان فارغ ٿـيـڻ بـعد نـوابشـاھہ ۾ وڪـالت شروع ڪيائين. ٿوري عرصي ۾ سـندس شمار وڏن قـانـونـي ماهرن ۾ ٿيڻ لڳو. کيس فـوجـداري ڪـيـسن تي دسترس حاصل هئي. هن 1958ع ۾ پنھنجي خاندان مان شـادي ڪئي. شاديءَ کانپوءِ سياسي ميدان ۾ بہ پير پاتائين. هيءُ شروع ۾ عوامي نيشنل پارٽيءَ ۾ شامل ٿيو، کيس ضلعي نوابشاھہ لاءِ صدر مقرر ڪيو ويو. ان وقت نوابشاھہ ۽ نوشهري فيروز هڪ ضلعو هوندو هو، ڪجهہ وقت کانپوءِ پارٽي ڌڙا بنديءَ جو شڪار ٿي وئي، تڏهن پاڻ 1964ع ڌاري مسلم ليگ ۾ شامل ٿيو. صدر ايوب جي دور حڪومت ۾ ڪيترائي ڀيرا گرفتار بہ ٿيو. کيس 1965ع ۾ فاطمہ جناح نوابشاھہ مان بي. ڊي جي اليڪشن ۾ انور ميمڻ وڪيل جي مقابلي ۾ اميدوار بيهاريو، جنهن تان ڪامياب ٿيو. 5 جنوري 1968ع تي جڏهن ذوالفقار علي ڀٽو، قاضي فيض محمد وٽ آيو تہ ڀُٽي صاحب عبدالفتاح ميمڻ کي پاڻ وٽ گهرائي پارٽيءَ ۾ شموليت لاءِ دعوت ڏني، جيڪا قبول ڪندي پاڪستان پيپلز پارٽيءَ ۾ شامل ٿيو. کيس 1971ع ۾ پاڪستان پيپلز پارٽي ضلعي نوابشاھہ جو صدر مقرر ڪيو ويو، بعد ۾ انهي سال کيس پيپلز پارٽي سنڌ جو جنرل سيڪريٽري مقرر ڪيو ويو. ان عهدي تي هو 1977ع تائين رهيو. کيس 1977ع واري اليڪشن ۾ پيپلز پارٽيءَ، جماعت اسلامي ۽ محمد اڪبر اڄڻ جي مقابلي ۾ قومي اسيمبليءَ جي سيٽ تي اميدوار بيهاريو، جتان کيس ڪاميابي حاصل ٿي. کيس ضياءُ الحق واري مارشلا جي دور ۾ ست ڀيرا گرفتار ڪيو ويو. ايم. آر. ڊي تحريڪ دوران 15 آگسٽ 1983ع تي آخري ڀيرو گرفتار ڪيو ويو، جنهن دوران 20 مئي 1984ع تائين ڪراچيءَ جي جيل ۾ کيس قيد رکيو ويو. آزاد ٿيڻ بعد ٻيهر وڪالت شروع ڪيائين ۽ سياست کان ڪنارہ ڪشي اختيار ڪيائين. عبدالفتاح ميمڻ 30 سيپٽمبر 1999ع تي وفات ڪئي.

داخلا ۾ استعمال ٿيل تاريخون

1932.07.31  عيسوي

نامور سياستدان عبدالفتاح ميمڻ، 31 جولاءِ 1932ع ۾ شهر ڀريا، ضلعي نوشهري فيروز ۾ علي نواز ميمڻ جي گهر ۾ جنم ورتو.

1999.09.30  عيسوي

عبدالفتاح ميمڻ 30 سيپٽمبر 1999ع تي وفات ڪئي.

شخصيتون - ڀاڱي جون ٻِيون داخلائون