علامه آءِ آءِ قاضي لائبرري، دادو

علامه آءِ آءِ قاضي لائبرري، دادو: علامه آءِ آءِ قاضي سنڌ گورنمينٽ لائبرري، دادو شهر ۾ انڊس هاءِ. وي جي ڏکڻ، سول اسپتال جي اتر، ڪمرشل ٽريننگ ڪاليج جي اوڀر ۽ ايس. پي هائوس جي اولهه ۾ واقع آهي. هن لائبرريءَ جو بنياد، 1965ع ۾ نامور اديب تاج صحرائي ۽ احمد خان ملڪاڻيءَ وڌو هو. ڪجهه عرصو هي لائبرري ضلعي ڪائونسل هال ۾ رکي وئي. هن لائبرريءَ جو افتتاح ان وقت جي ڪمشنر مسرور احسن پنهنجي هٿن سان سنگ بنياد رکي ڪيو. 1989ع ۾ سنڌ گورنمينٽ هن لائبرريءَ کي ضلعي ڪائونسل جي انتظاميا کان واپس وٺي، ثقافت کاتي سنڌ حوالي ڪيو. ثقافت کاتي پاران 1989ع ۾ ان وقت وزيراعليٰ سنڌ سيد قائم علي شاهه افتتاح ڪيو. هن وقت لائبرريءَ کي پنهنجي الڳ عمارت آهي. جنهن ۾ سنڌي، اردو ۽ انگريزيءَ ۾ مختلف موضوعن تي 30 هزار کان وڌيڪ ڪتاب موجود آهن. ان کان سواءِ 60 کن ماهوار ۽ پندرهن روزه رسالا ۽ اخبارون پڻ لائبرريءَ ۾ دستياب رهن ٿا. شهر توڙي آسپاس جو ساڃاهه وند طبقو ۽ شاگرد هن لائبرريءَ مان لاڀ حاصل ڪندا رهن ٿا.

لائبرري - ڀاڱي جون ٻِيون داخلائون