علي گوهر خان مهر (اول)

علي گوهر خان مهر (اول): سردار علي گوهر (اول) ولد سردار حاجي خان 1890ع ڌاري خانڳڙهه ۾ ڄائو. ابتدائي تعليم پنهنجي ڳوٺ مان حاصل ڪيائين. 1931ع ۾ سندس والد گذاري ويو ته راڄ ڀاڳ جون ذميواريون مٿس پيون. 1933ع ۾ لوڪل بورڊ ميرپور ماٿيلي جو صدر چونڊيو ويو. سياست ۾ سندس استاد مشهور سياستدان قيصر خان بوزدار هو. 1942ع ۽ 1946ع ۾ مسلم ليگ جي ٽڪيٽ تي گهوٽڪيءَ مان ڪامياب ٿيو. 1953ع ۾ مغربي پاڪستان جي قومي اسيمبليءَ ۾ ميمبر ٿيو ۽ جنرل ايوب خان جي مارشل لا تائين ميمبر رهيو. پنهنجي استاد وانگر هي به سدائين حڪومت ۾ شامل هوندو هو، جو حڪمران طبقي سان سٺا تعلقات رکندو هو. صدر ايوب سان دوستي هوندي هيس. جڏهن بيمار ٿيو ته صدر ايوب کيس اسپتال ۾ پڇڻ آيو. علي گوهر مهر جي وڏي ڏاڏي الهه ورائي خان کي مغلن طرفان ميرپور ماٿيلي ۾ جاگير ڏني وئي. وري ڪلهوڙن جي دور ۾ کين ڪافي زمينون بخشش ۾ مليون. انگريزن جي وقت ۾ سندس ڏاڏي سردار محمد بخش خان کي وائسراءِ هند طرفان ٻين انعامن سان گڏ هڪ بندوق به انعام ۾ ملي هئي. کيس ڪو به اولاد ڪونه ٿيو ۽ پاڻ 1962ع ۾ وفات ڪري ويو. کانئس پوءِ سندس سئوٽ غلام محمد خان مهر کي سرداريءَ جي پڳ ٻڌرائي وئي.

شخصيتون - ڀاڱي جون ٻِيون داخلائون