عيد محمد اجميري (طبلي نواز): نامياري طبلي نواز عيد محمد اجميريءَ جو جنم 1938ع ۾ ٿيو. خواجہ معين الدين چشتيءَ جي محبت ۾ پنھنجي نالي سان گڏ اجميريءَ جو لقب رکيو هئائين. هن ٻالڪپڻ ۾ ئي طبلي وڄائڻ جي سکيا پنھنجي ناني ۽ پيءُ کان ورتي. ورهاڱي بعد اجمير شريف (هندستان) مان لڏي پنھنجي ڪٽنب سان گڏ ڪراچيءَ ۾ رهـائـش اخـتيـار ڪـيائيـن ۽ هتي گهنشام نالي هڪ ڊانس اڪيڊميءَ ۾ طبلي جي سکيا وٺڻ جي باقاعدہ شروعات ڪيائين. هن اڪيڊميءَ ۾ ڪيترائي ناليوارا طبلي نواز ايندا هئا، جيڪي سندس استاد رهيا. کيس، طبلي تي گيت ۽ غزل سان گڏ ڪلاسيڪل ڊانس وڄائڻ تي پڻ مهارت حاصل هئي. پيشي جي لحاظ سان پاڻ ڪيتري ئي عرصي کان ريڊيو پاڪستان، ڪراچي سان سلهاڙيل رهيو. کيس Solo سولو، ڪلاسيڪل ۽ فلمي گيتن تي طبلو وڄائڻ تي عبور حاصل هو. هن هندستان سميت دنيا جي
ڪيترن ئي ملڪن ۾ پنھنجي فن جو مظاهرو ڪري خوب داد ماڻيو. کيس لنڊن جي تاريخي البرٽ هال ۾ برطانوي راڻيءَ اڳيان پرفارم ڪرڻ جو اعزاز پڻ حاصل ٿيو. هن ملڪ جي ناميارن فنڪارن سان گڏجي پنھنجي فن جو مظاهرو ڪيو، جن ۾ ملڪہ موسيقي روشن آرا بيگم، ڪجن بيگم ۽ غلام علي، نورجهان، مهدي حسن، اقبال بانو وغيرہ جا نالا قابل ذڪر آهن. رونا ليليٰ ۽ محمد يوسف جي سنڌي فلمن ۾ ڳايل گانن ۾ پڻ هن ئي طبلو وڄايو. ان ڏس ۾ سنڌي موسيقارن غلام نبي ۽ عبداللطيف سان پڻ ڪم ڪيائين. ان کان سواءِ ملڪ جي ٻين موسيقارن جھڙوڪ: استاد نٿو خان، رفيق غزنوي، سھيل رعنا سميت ٻين ڪيترن ئي موسيقارن لاءِ طبلي جي ڌن وڄايائين. هن 25 مئي 2015ع تي دل جي دوري سبب وفات ڪئي.