غلام سرور عباسي: مشهور وڪيل ۽ سماجي ڪارڪن غلام سرور ولد رسول بخش عباسي 31 آڪٽوبر 1931ع تي ڳوٺ وڏو واهڻ، تعلقي ڏوڪري، ضلعي لاڙڪاڻي ۾ جنم ورتو. هن پرائمري تعليم ڳوٺ ڪنيا، تعلقي ڏوڪريءَ ۾، سيڪنڊري تعليم ڳوٺ پٺاڻ تعلقي باقراڻي مان ، مئٽرڪ فرسٽ ڊويزن ۾ گورنمينٽ پائلٽ هاءِ اسڪول لاڙڪاڻي مان 1951ع ۾ بي. اي سنڌ مسلم ڪاليج ڪراچيءَ مان 1955ع ۾ پاس ڪيائين ۽ ايل.ايل.بي 1957ع ۾ سنڌ مسلم ڪاليج ڪراچيءَ مان پاس ڪري ساڳئي سال حيدرآباد ۾ وڪالت شروع ڪيائين. والد جي وفات سبب حيدرآباد ڇڏي واپس ڳوٺ وڏي واهڻ آيو، جتي خانداني معاملا سنڀالڻ لڳو ۽ اتي ئي وڪيل غلام علي عباسيءَ جي رهنمائيءَ سان سيپٽمبر 1958ع کان لاڙڪاڻي ۾ وڪالت شروع ڪيائين. ڪجهه عرصي بعد لاڙڪاڻو ڊسٽرڪٽ بار ايسوسيئيشن جو ميمبر ٿيو. 1978ع ۽ 1979ع ۾ ٻه دفعا بار ايسوسيئيشن جو جنرل سيڪريٽري چونڊيو ويو. 1986ع ۽ 1993ع ۾ ٻه دفعا ڊسٽرڪٽ بار ايسوسيئيشن لاڙڪاڻي جو صدر به چونڊيو ويو. ان کان علاوه سماجي ڪمن ۾ به حصو ورتائين. ٻه ڀيرا يونين ڪائونسل پٺاڻ جو ميمبر چونڊيو ويو. 1958ع ۾ ڳوٺ سڌار پراجيڪٽ ۾ اهم ڪردار ادا ڪيائين، جنهن دوران علائقي ۾ ڪيترائي سماجي ڪم ڪرايائين. 1961ع ۾ لاڙڪاڻو ڪوآپريٽو ايجوڪيشن سوسائٽيءَ جو ميمبر ٿيو، جتي لاڙڪاڻو ڪاليج آف ڪامرس ۽ اڪنامڪس شروع ڪيو. ڪوآپريٽو ايجوڪيشن سوسائٽيءَ جو 1970ع ۾ جوائنٽ سيڪريٽري، خزانچي ۽ جنرل سيڪريٽري چونڊيو، جنهن دوران هن لاڙڪاڻي ۾ لٽل فوڪس انگلس ميڊيم اسيڪول کوليو، جيڪو بعد ۾ 1972ع ۾ حڪومت قومي تحويل ۾ وٺي ڇڏيو. 1970ع ۽ 1971ع ۾ روٽري ڪلب لاڙڪاڻي جو ميمبر پوءِ جنرل سيڪريٽري ۽ صدر بڻيو. 1975ع ۾ سنڌ گريجوئيٽس ايسوسيئيشن جو ميمبر ٿي برانچ قائم ڪيائين ۽ ان جو 1986ع تائين پهريون صدر رهيو. 1983ع کان 1988ع تائين مفت ايوننگ ڪلينڪ شيوا منڊلي پاڙي ۾ کولرايائين، جنهن جي سهائتا يونيسيف ڪئي. لاڙڪاڻو ڪميونٽي ڊيولپمنٽ پروجيڪٽ جو 1981ع کان 1993ع تائين صدر چونڊيو ويو، هن ڇوڪرين لاءِ ووڪيشنل سينٽر کوليو، جنهن ۾ 400 ڇوڪرين کي سلائي ۽ ڀرت جي تربيت ڏني وئي. 1983ع کان 1991ع تائين سنڌ پراونشل ڪوآپريٽو بئنڪ ڪراچيءَ جو ڊائريڪٽر رهيو. 1988ع کان 1992ع تائين پراونشل ڪوآپريٽو يونين سنڌ جو ڊائريڪٽر ۽ 1979ع کان اڄ تائين وليد ايگريڪلچر ڪوآپريٽو سوسائٽيءَ لميٽڊ جو چيئرمين آهي. پيپلز لائرز فورم جو صدر ٿيو ۽ اليڪشن ڪرائي مڌرس ٽرسٽ جي بورڊ آف ٽرسٽيز جو ميمبر ۽ 2002ع کان ريهبليٽشن سينٽر (معذور ٻارن جي اداري) جي مئنيجنگ ڪاميٽيءَ جو ميمبر آهي. کيس سماجي خدمتن جي مڃتا طور 1990ع ۾ سوشل ويلفيئر ڪائونسل طرفان اوارڊ ڏنو ويو. ان کان علاوه هن هندستان جو دورو پڻ ڪيو جنهن ۾ اين.سي.ايس.سي آف پاڪستان جي وفد جي قيادت ڪئي. اهڙيءَ طرح غلام سرور عباسي سڄي زندگي سماجي ڪمن ۽ انساني همدرديءَ ۾ گذاري آهي. کيس سماجي، علمي ۽ ادبي ڪمن جي مڃتا طور ڪيترا اوارڊ، شيلڊون ۽ مڃتا سرٽيفڪيٽ ملي چڪا آهن. هن وقت اسلام آباد ۾ رهي ٿو.
1931.10.31 عيسوي
مشهور وڪيل ۽ سماجي ڪارڪن غلام سرور ولد رسول بخش عباسي 31 آڪٽوبر 1931ع تي ڳوٺ وڏو واهڻ، تعلقي ڏوڪري، ضلعي لاڙڪاڻي ۾ جنم ورتو.