غلام محمد خان ٽالپر: هي خيرپور رياست جي باني حاڪم مير سهراب خان ٽالپر جو ننڍو ڀاءُ هو. جڏهن هالاڻيءَ جي جنگ ۾ ميان عبدالنبي، مير فتح علي خان هٿان شڪست کائي قلات ڀڄي ويو. تڏهن قلات جي حاڪم کان مدد گهريائين، ۽ گڏوگڏ جوڌپور جي راجا کي بہ لکيائين، تہ تون بہ مير فتح علي خان تي ڪاھہ ڪري عمرڪوٽ پنھنجي هٿ هيٺ ڪر. اهو ٻڌي جوڌرپور جو راجا ڏاڍو خوش ٿيو ۽ هڪدم پنهنجو لشڪر عمرڪوٽ موڪليائين، جنهن عمرڪوٽ پنھنجي قبضي ۾ ڪيو. اها خبر جڏهن مير فتح علي خان کي پئي، تڏهن مير صاحب پنهنجن اميرن، وزيرن ۽ مير سهراب خان سان صلاح مشورو ڪيو ۽ صلاح مشوري کانپوءِ مير غلام محمد خان کي لشڪر ڏئي عمرڪوٽ خالي ڪرائڻ لاءِ موڪليو. مير غلام محمد خان وڏو بھادر ۽ جنگي فن جو ماهر هو. جڏهن جوڌپور جي لشڪر کي خبر پئي تہ مير فتح علي خان جو سپھہ سالار جنگ ڪرڻ لاءِ آيو آهي ۽ وٽس ايترو لشڪر بہ نہ آهي، تڏهن هنن پاڻ ۾ صلاح ڪئي تہ ڇو نہ مير غلام محمد ۽ سندس مخصوص لشڪر کي اتي ئي ختم ڪري ڇڏجي. ائين ڪرڻ سان ميان عبدالنبي بہ خوش ٿيندو ۽ عمرڪوٽ هميشہ لاءِ اسان جو ٿي ويندو. اهو فيصلو ڪري هنن مير غلام محمد خان ۽ سندس مختصر لشڪر تي حملو ڪري ڏنو. ٻنهي لشڪرن ۾ خونخوار جنگ لڳي، پر آخر لشڪر مختصر هجڻ ڪري مير غلام محمد خان شھيد ٿي ويو. ڪنهن شاعر سندس مادہ تاريخ هيئن چئي آهي:
پئي سال ترحيل آن جان نثار
‘اجل’ با ‘غلام محمد’ شمار
34 + 163 = 1197ھہ
مير غلام محمد خان جي شهادت جو ٻڌي مير فتح علي خان ۽ مير سهراب خان سموري لشڪر سميت عمرڪوٽ جو رخ ڪيو، پر مير فتح علي خان جي اچڻ جو ٻڌي جوڌپور جو لشڪر عمرڪوٽ ڇڏي ڀڄي ويو.