ڊاڪٽر فرمان فتحپوري

فرمان فتحپوري، ڊاڪٽر: فرمان فتحپوري اردوءَ جو ناميارو محقق، لساني ماهر، ليکڪ ۽ نقاد ٿي گذريو آهي. هن اتر پرديش جي فتح پور واري علائقي ۾ 26 جنوري 1926ع تي جنم ورتو. ننڍي هوندي ئي کيس والد جي وفات جو صدمو برداشت ڪرڻو پيو. هن مئٽرڪ فتح پور ۽ انٽر الھہ آباد مان حاصل ڪئي. 1950ع ۾ هن آگرا مان گريجوئيشن ڪئي. هي ان کان پوءِ پاڪستان لڏي آيا ۽ اچي ڪراچيءَ ۾ رهيا. هن ڪراچيءَ يونيورسٽيءَ مان ايل.ايل.بي ڪئي. 1965ع ۾ اردو ادب ۾ پي ايڇ.ڊي ڪيائين. پاڻ زندگيءَ جا 30 سال ڪراچي يونيورسٽيءَ سان وابستہ رهيو. 1985ع ۾ کيس اردو ڊڪشنري بورڊ جو چيف ايڊيٽر ۽ سيڪريٽري مقرر ڪيو ويو. 1996ع ۾ سنڌ سول سروس بورڊ جي ميمبر طور پنھنجون خدمتون سرانجام ڏنائين. ان وقت ’نگار‘ اردوءَ جو مشھور ادبي ۽ علمي رسالو نڪرندو هو، جنھن جو کيس ايڊيٽر مقرر ڪيو ويو. اهو رسالو اردوءَ جي نامياري عالم، محقق ۽ ليکڪ نياز فتحپوريءَ جاري ڪيو هو. هن غالب ۽ اقبال جي شاعريءَ سميت لسانيات، تنقيد ۽ سوانح عمري سميت مختلف موضوعن تي 60 کان وڌيڪ ڪتاب لکيا. هن جي مشھور تصنيفن ۾ ’اردو رباعي‘، ’تدريس اردو‘، ’اردو ڪي منظوم داستان‘، ’تحقيق و تنقيد‘، ’قمر زماني بيگم‘، ’نيا اور پرانا ادب‘، ’نواب مرزا شوق ڪي مثنويان‘، ’زبان اور اردو زبان‘، ’اردو رسم الخط‘، ’اردو ڪي نعتيه شاعري‘، ’فن و تاريخ گوئي‘، ’اردو شعرا ڪي تذڪري اور تذڪره نگاري‘، ’مير انيس‘، ’حيات اور شاعري‘، ’غالب شاعر امروز و فردا‘، ’درياءِ عشق اور بحر محبت ڪا مطالعه‘،’ اردو افسانا اور افسانا نگاري‘، ’هندي اردو تنازعه‘ ۽ ’عورت اور فنون لطيفہ‘ ڪتاب شامل آهن. هو سنڌي لئنگيئج اٿارٽيءَ جي بورد آف گورنرس جو بہ ميمبر رهيو، کيس ادبي خدمتن عيوض 1985ع ۾ ستارہ امتياز سان پڻ نوازيو ويو. هن 3 آگسٽ 2013ع تي وفات ڪئي.

داخلا ۾ استعمال ٿيل تاريخون

1926.01.26  عيسوي

فرمان فتحپوري اردوءَ جو ناميارو محقق، لساني ماهر، ليکڪ ۽ نقاد ٿي گذريو آهي. هن اتر پرديش جي فتح پور واري علائقي ۾ 26 جنوري 1926ع تي جنم ورتو.

2013.08.03  عيسوي

ڊاڪٽر فرمان فتحپوري 3 آگسٽ 2013ع تي وفات ڪئي.

شخصيتون - ڀاڱي جون ٻِيون داخلائون