ڊاڪٽر فهيم شناس ڪاظمي

فھيم شناس ڪاظمي، ڊاڪٽر: استاد فھيم شناس ڪاظميءَ جو اصل نالو سيد فھيم اقبال آهي. 11 مئي 1965ع تي، نوابشاھہ ۾ ڄائو. سندس خانداني نسبت سخي شاھہ رسول ۽ پنجابي صوفي شاعر شاھہ شرف سان ملي ٿي. سنڌ يونيورسٽيءَ مان ايم.اي (اردو ادب) ڪرڻ کان پوءِ سنڌ مسلم گورنمينٽ آرٽس ۽ ڪامرس ڪاليج ڪراچيءَ ۾ ليڪچرر مقرر ٿيو، جتان ترقي ڪندي پروفيسر جي عھدي تي پھتو. 2015ع ۾ اردوءَ جي مشھور شاعر عزيز حامد مدني جي شخصيت ۽ فن جي موضوع تي مقالو لکي ڪراچي يونيورسٽيءَ مان Ph.D جي ڊگري حاصل ڪئي. سندس اردو شاعريءَ جا 3 مجموعا ’سارا جھان آئينہ هي‘ (1999ع)، ’خواب سي باهر‘ (2009ع)، ’راهداري مين گونجتي نظم‘ (2013ع) ڇپجي چُڪا آهن. هي هڪ سٺو مترجم بہ آهي. هن سنڌي ۽ ٻين ٻولين مان ترجما پڻ ڪيا آهن تہ ڪجهہ ڪتابن کي ترتيب ۽ ايڊٽ بہ ڪيو آهي، جن ۾: ’سنڌ ڪي آواز‘ (جي. ايم سيد جو عدالتي بيان: 2002ع)، ’سارتر ڪي بيمثال افساني‘ (2012ع)، ’سارتر ڪي مضامين‘ (2012ع)، ’تيري عشق ني مالا مال ڪيا هي‘ (صابر ظفر جي گيتن ۽ غزلن جو انتخاب: 2004ع)، ’بوئي گل نالئه دل‘ (شيخ اياز جي شاعري، جلد پھريون: 2010ع)، ’حلقہ ميري زنجير ڪا‘ (شيخ اياز، جلد ٻيو: 2010ع)، ’زان پال سارتر ڪي انٽرويو‘ (2016ع) ۽ ڪليات سارا شگفتہ (2020ع) شامل آهن.
فھيم شناس ڪاظمي صحافت سان بہ لاڳاپيل رهيو آهي. هو سه ماهي ’اجرا‘ ڪراچيءَ جو سب ايڊيٽر ۽ روزنامه ’جسارت‘ ۽ روزنامه ’قومي اخبار‘ ۾ ڪالم لکندو رهي ٿو. کيس ادبي خدمتن جي اعتراف طور ڪيترائي ايوارڊ ۽ اعزاز ملي چُڪا آهن، جن ۾: ’آهٽ ايوارڊ‘ (بھترين شاعر: 2003ع)، ’جناح ايوارڊ‘ (بھترين شاعر ۽ نقاد: 2012ع)، ’نشان سڀاس‘ خانہ فرهنگ ايران ڪراچي (2015ع) شامل آهن.

داخلا ۾ استعمال ٿيل تاريخون

1965.05.11  عيسوي

استاد فھيم شناس ڪاظميءَ جو اصل نالو سيد فھيم اقبال آهي. 11 مئي 1965ع تي، نوابشاهه ۾ ڄائو.

شخصيتون - ڀاڱي جون ٻِيون داخلائون