قربان بگٽي

قربان بگٽي: قربان علي ولد روحل خان بگٽي لاڙڪاڻي شھر لڳ سندس ڏاڏي جي نالي سان ٻڌل ڳوٺ گلاب خان بگٽيءَ ۾ پھرين جون 1936ع تي ڄائو. سندس خاندان اٽڪل ڏيڍ سؤ سال اڳ بلوچستان کان لڏي لاڙڪاڻي ۾ رهائش پذير ٿيو. بي. اي سنڌ يونيورسٽيءَ مان 1960ع ۾ پاس ڪيائين. هن پنھنجي عملي زندگيءَ جو آغاز 1954ع ۾ بئراج کاتي ۾ ڪلارڪ طور ڪيو. 26 سالن بعد اسسٽنٽ مختيارڪار جي حيثيت ۾ 1980ع ۾ رٽائرمينٽ ورتائين. ادبي حلقي ۾ تنقيد نگار طور کيس وڏي پذيرائي ملي. ڪيترين ئي ٻولين جو ڄاڻو هو. جھڙوڪ بلوچي، اردو، عربي، فارسي، انگريزي ۽ سنڌي ٻولين جو ڄاڻو هو، خاص ڪري قومپرستن، سوشلسٽن ۽ ڪميونسٽن تي سخت ٻوليءَ ۾ تنقيد سبب مشھور هو. ادب ۽ تنقيد تي سندس ڪيترائي ڪتاب ڇپيل آهن، جن ۾: ’ڀيلي تي ڀليڪار‘ (شيخ اياز ۽ سندس شاعري، تنقيدون ۽ تبصرا)، ’سيڻ مٽائن سون تي‘ (پير حسام الدين راشدي ۽ سندس ڪتاب تي تنقيد)، ’ڪميونسٽ منشور‘ (مطالعاتي جائزو)، ’پاڪستان جو ٺھراءُ‘ ۽ ’ترقي پسند فڪر جو مطالعو‘ شامل آهن. ان کانسواءِ ’ڀٽو ۽ ون يونٽ‘، ’قرارداد پاڪستان‘، ’رسول خدا مغربي نقادن جي نظر ۾‘، ’رسول خدا جون شاديون‘، ’ميمڻ عبدالمجيد سنڌي ۽ سندس ادبي چوريون‘ ۽ ’لاڙڪاڻي ۾ بگٽين جي آبادڪاري‘ جھڙا تحقيقي مضمون بہ لکيائين. سندس ڪتابن ۽ مضمونن تي لطيف ايوارڊ، رهبر گلڊ ايوارڊ ۽ هجره ايوارڊ وغيرہ مليا. اٽڪل چئن سالن تائين هو روزانو ’آفتاب‘ اخبار جو لاڙڪاڻي ۾ بيورو چيف بہ رهيو. 7 جنوري 1986ع تي دل جي باءِ پاس ٿيڻ کان پوءِ وفات ڪري ويو.

داخلا ۾ استعمال ٿيل تاريخون

1936.06.01  عيسوي

قربان علي ولد روحل خان بگٽي لاڙڪاڻي شھر لڳ سندس ڏاڏي جي نالي سان ٻڌل ڳوٺ گلاب خان بگٽيءَ ۾ پھرين جون 1936ع تي ڄائو.

1986.01.07  عيسوي

قربان بگٽي 7 جنوري 1986ع تي دل جي باءِ پاس ٿيڻ کان پوءِ وفات ڪري ويو.

شخصيتون - ڀاڱي جون ٻِيون داخلائون