لُسو فقير ڪاڪڙو: هي بزرگ ولھار جي درويش ’ڳاڙهي صدر اوٺي‘ جو همعصر هو، جيڪو ستين صدي هجريءَ جو ٻُڌايو وڃي ٿو. مقامي ماڻهو هن بزرگ کي ’درويش لُسو فقير‘ جي نالي سان سَڏين ٿا. لُسي فقير بابت روايت مِلي ٿي ته، شاهه عبداللطيف ڀٽائي سندس مزار ڀرسان بِيٺل ڪَنڊيءَ جي وڻ هيٺان آرامي ٿيندو هو. روايتن ۾ آهي ته، لُسو فقير ڪاڪڙو جا درويش ڳاڙهي صدر اوٺي کانسواءِ ٻين ٽن درويشن جرڪس ڏناڻي، راجسين سومراڻي ۽ اِبراهيم نانگوراڻي سان به ويجهڙائي هئي ۽ اِهو به پتو پوي ٿو ته اِهي پنج ئي درويش حضرت غوث بھاءُ الدين زڪريا مُلتانيءَ جا مُريد هئا. موجوده چنبڙ شھر کان ٿورو اڳتي اوڀر طرف ’سنجر چانگ‘ روڊ ڀرسان هڪ قديم قبرستان ’درويش لُسو فقير‘ جي نالي سان سَڏجي ٿو، جتي هي فقير مدفون آهي. جتي هاڻي درگاهه به اڏائي ويئي آهي.