رچنداڻي ليلارام

ليلارام رچنداڻي : سنڌي ٻوليءَ جو ناميارو عالم ۽ ليکڪ ليلارام رچنداڻي، 24 جولاءِ 1924ع تي ٺارو شاھہ، ضلعي نوشهري فيروز ۾ جنم ورتو. ورهاڱي کانپوءِ ڀارت جي شھر احمد آباد ۾ وڃي آباد ٿيو. هن سنڌي ٻوليءَ تي جيڪو يادگار ڪم ڪيو آهي. اهو سنڌي ادب ۾ املھہ خزاني جي حيثيت رکي ٿو. ڪيترين ئي اخبارن توڙي رسالن سان بہ لاڳاپيل رهيو، ڪيترن ڪتابن جو مصنف ۽ مترجم رهيو آهي. سندس شايع ٿيل ڪتابن ۾: (1) ’سنڌوءَ جي جهلڪ‘ (تاريخ)، (2) ’سنڌي وياڪرڻ‘، (3) ’سنڌو درشن‘ (تاريخ)، (4) ’سنڌي ٻوليءَ جو وڪاس‘ (تاريخ)، (5) ’سنڌي لوڪ ڪٿائون ۽ پسمنظر‘ (تحقيق)، (6) ’سنڌي ٻولي: مختصر تاريخ ۽ وڪاس‘ (تحقيق)، (7) ’سنڌي نظم جي تاريخ‘، (8) ’آزاديءَ کانپوءِ گجرات ۾ سنڌي ساهت‘ (تحقيق)، (9) ’آزاديءَ بعد سنڌي ساهت جو اتهاس‘ (تحقيق)، (10) ’اڏيرو لعل سنڌي شاعريءَ جي تاريخ‘ قابلِ ذڪر آهن. ليلارام رچنداڻي هڪ عالم ۽ ليکڪ هجڻ سان گڏ لسانيات جو ماهر بہ رهيو آهي. هو صحافت جي پيشي سان بہ وابستہ رهيو. ورهاڱي کان اڳ سنڌ مان جاري ٿيندڙ سنڌي اخبارن ۾ وقت بوقت پنهنجون صحافتي خدمتون سرانجام ڏيندو رهيو. هن عالم، ليکڪ، صحافي، ماهر لسانيات ۽ محقق کي سندس علمي ۽ ادبي خدمتن جي عيوض ڪيترن اعزازن ۽ اوارڊن سان نوازيو ويو آهي.

داخلا ۾ استعمال ٿيل تاريخون

1924.07.24  عيسوي

سنڌي ٻوليءَ جو ناميارو عالم ۽ ليکڪ ليلارام رچنداڻي، 24 جولاءِ 1924ع تي ٺارو شاهه، ضلعي نوشهري فيروز ۾ جنم ورتو.

اديب - ڀاڱي جون ٻِيون داخلائون