مجنون فقير ٻرڙو: نامياري سگهڙ مجنون فقير ٻرڙي جو اصل نالو واحد بخش ولد عبدالحڪيم ٻرڙو هو، هن ضلعي لاڙڪاڻي جي ڳوٺ جان محمد ٻرڙي لڳ نئين ديري ۾ 1928ع ڌاري جنم ورتو، هن پرائمريءَ جا چار درجا تعليم حاصل ڪئي، جنهن بعد محنت مزدوري ڪري، کٽون واڻي پنهنجو گذر سفر ڪندو هو. هڪ ڀيري کٽون واڻڻ دوران سندس ملاقات هڪ سگھڙ ڪريم بخش وسطڙي سان ٿي، جنهن جا بر زبان بيت ۽ ڪلام ٻڌي هي بيحد متاثر ٿيو ۽ کيس ئي استاد تسليم ڪندي سگھڙائپ جي دنيا ۾ قدم رکيائين. هن لوڪ ادب جي صنفن مان سينگار، ڏٺ پرولي، ڳجھارت ۽ ڏور تي ڪافي طبع آزمائي ڪئي. مجنون فقير سگهڙ هجڻ سان گڏ هڪ سٺو رقاص به هو. سگھڙن جي ڪچهرين ۾ سندس فن جو انداز موهي وجھندو هو، هو هميشه اٿي بيهي شعر پڙهندو هو ۽ ڪڏهن ڪڏهن ضرورت آهر پنهنجي شعر جي وچ ۾ ئي جھمر واري انداز ۾ ٻانهن کي لوڏيندو هو.