محمد فقير مسخرو

محمد فقير مسخرو: مشھور مزاحيہ فنڪار فقير محمد بخش ولد چاڪر خان لغاري 27 مئي 1914ع تي ڳوٺ وارياسو، تعلقي جوھي، ضلعي دادوءَ ۾ جنم ورتو. 1918ع ۾ پليگ جي وبا سبب سندس پيءُ وفات ڪئي، جنھن بعد سموري پالنا سندس مامي پرئي فقير وٽ ميھڙ ۾ ٿي. 1955ع ڌاري ڊاڪٽر نبي بخش خان بلوچ جي چوڻ تي وڏي عمر ۾ پرائمري اسڪول دادو ۾ پڙھڻ لاءِ ويٺو. جتان سنڌيءَ جا پنج درجا پاس ڪيا. مشھور سياستدان پير مظھر الحق بھ سندس هم ڪلاسي ھو. ھن مزاحيھ فن جي سکيا، ڏھن سالن جي عمر ۾ پنھنجي مامي پرئي فقير کان ورتي. هن پنھنجي فن جي باقاعده شروعات ميھڙ ۽ دادو جي ٿيندڙ پروگرامن کان ڪئي. ريڊيو ۽ ٽي. ويءَ تي مشھور مزاحيھ فنڪارن قادو شيدي ماتلي واري ۽ حيدرآباد جي پيپلي سان گڏ فن جو مظاھرو ۽ مقابلو ڪيو. 1942ع جي ٻوڏ دوران بندن تي ڪم ڪندڙ ماڻهن ۽ رضاڪارن کي مزاحيھ ٽوٽڪا ٻڌائي سندن دل وندرائي. 1944ع ۾ دادو-لاڙڪاڻي لائين تي ريل گاڏين ۾ چڙھي مسافرن لاءِ وندر پيدا ڪئي. ھن ڪيترائي شاگرد پيدا ڪيا، جن ۾ قادر بخش مٺو، رشيد چارڻ ۽ حضور بخش گوپانگ قابل ذڪر آھن. ھن شھيد ذوالفقار علي ڀٽي، پير الاھي بخش، عبدالستار پيرزادي، ايوب کھڙي ۽ ٻين ڪيترن ئي نامور سياستدانن آڏو فن جو مظاھرو ڪري انعام حاصل ڪيا. اڳوڻي گورنر شيخ دين محمد مڃتا طور کيس 12 ايڪڙ زمين انعام ۾ ڏني. ھن شاھھ عبداللطيف ڀٽائي، قلندر شھباز ۽ ٻين ڪيترن ئي بزرگن تي ٿيندڙ ثقافتي ڪانفرنسن ۾ پنھنجي فن وسيلي داد حاصل ڪيو. ھن شاھھ لطيف جو ڪافي رسالو حفظ پڻ ڪيو. جنھن ۾ سندس رھنمائي ڊاڪٽر نبي بخش خان بلوچ، محمد سومار شيخ ۽ ممتاز مرزا ڪئي. 27 فيبروري 1985ع تي ساھ جي تڪليف سبب وفات ڪئي. سندس آخري آرامگاھ لال ھندي قبرستان دادوءَ ۾ آھي.

داخلا ۾ استعمال ٿيل تاريخون

1914.05.27  عيسوي

مشھور مزاحيہ فنڪار فقير محمد بخش ولد چاڪر خان لغاري 27 مئي 1914ع تي ڳوٺ وارياسو، تعلقي جوھي، ضلعي دادوءَ ۾ جنم ورتو.

1985.02.27  عيسوي

محمد فقير27 فيبروري 1985ع تي ساھ جي تڪليف سبب وفات ڪئي. سندس آخري آرامگاھ لال ھندي قبرستان دادوءَ ۾ آھي.

شخصيتون - ڀاڱي جون ٻِيون داخلائون