مرتضيٰ سيال

مرتضيٰ سيال : اديب، شاعر، ڪالم نگار ۽ صحافي مرتضيٰ سيال جو پورو نالو غلام مرتضيٰ ولد در محمد سيال آهي. هن 29 جون 1965ع تي هالاڻي، ضلعي نوشهري فيروز ۾ جنم ورتو. پرائمري تعليم هالاڻيءَ جي پرائمري اسڪول مان ورتائين ۽ مئٽرڪ 1980ع ۾ گورنمينٽ هاءِ اسڪول هالاڻيءَ مان ڪيائين. گرئجوئيشن کانپوءِ، ايم. اي سنڌ يونيورسٽي، ڄام شوري جي ماس ڪميونيڪيشن شعبي مان، فرسٽ ڪلاس سيڪنڊ پوزيشن ۾ پاس ڪيائين. مرتضيٰ سيال لکڻ جي شروعات 1978ع کان ٻاراڻي ادب سان ڪئي. سندس تحريرون روزاني هلال پاڪستان، عبرت، آفتاب، گل ڦل، رابيل، گلن جهڙا ٻارڙا، لالي رسالن ۽ مختلف سنڌي اخبارن ۾ ڇپجنديون رهيون. هن ڪهاڻيون ۽ ڪالم به لکيا آهن ۽ شاعري به ڪئي آهي. مرتضيٰ سيال عملي زندگيءَ جي شروعات 1992ع ۾ سنڌ يونيورسٽيءَ ۾ پبلڪ رليشنس آفيسر طور ڪئي، 2000ع ۾ ايڊيشنل ڪنٽرولر امتحانات ٿيو. ان کان سواءِ ايڊمنسٽريٽوِ آفيسر، ڊپٽي ڪنٽرولر، ايڊيشنل رجسٽرار ۽ ڪجهه وقت لاءِ رجسٽرار جي عهدي تي به رهي چڪو آهي. هن وقت سنڌ يونيورسٽيءَ جي پريس مئنيجر طور ذميواريون سنڀالي رهيو آهي. مرتضيٰ سيال 1989ع ۾ عبرت مئگزن جي ايڊيٽوريل بورڊ جي ميمبر ۽ 1990ع ۾ انچارج ايڊيٽر ۽ 2000ع کان اپريل 2012ع تائين اعزازي ايڊيٽر جون ذميواريون به نڀايون آهن. مرتضيٰ سيال شاگرديءَ واري زماني ۾ وطن دوست اسٽوڊنٽس فيڊريشن سان لاڳاپيل رهيو ۽ سرگرم ڪردار ادا ڪيائين. ان کان سواءِ پروگريسو يوٿ آرگنائيزيشن ۽ سنڌي ادبي سنگت سان به سندس پراڻي وابستگي رهي آهي. سنڌي ادبي سنگت جي مرڪزي چونڊن جي چونڊ ڪميٽيءَ جو ڪيترا ڀيرا ميمبر ۽ چيئرمئن رهي چڪو آهي. سنڌ يونيورسٽي فورم ۽ سنڌ يونيورسٽي آفيسرس ايسوسيئيشن جو ميمبر آهي. کيس ادبي ۽ صحافتي خدمتن تي ڪيترا اوارڊ ۽ سرٽيفڪيٽ ملي چڪا آهن، جن ۾ اجرڪ آرٽ اوارڊ (90-1989ع)، اي. پي. اين. ايس اوارڊ (06-2005ع) وغيره شامل آهن. سندس چونڊ ڪالمن ۽ انٽرويوئن جا ڪتاب ڇپائيءَ هيٺ آهن. مرتضيٰ سيال ماهوار ’سائنس‘ ڄام شوري جو فني صلاحڪار، ’صحت ۽ ماحول‘ رسالي جي ايڊيٽوريل بورڊ جو ميمبر، ٻارن جي رسالي ’انڊلٺ‘ جي صلاحڪاري بورڊ جو ميمبر، ماهوار هزار داستان جي ايڊيٽوريل بورڊ جو ميمبر به رهي چڪو آهي.

داخلا ۾ استعمال ٿيل تاريخون

1965.06.29  عيسوي

اديب، شاعر، ڪالم نگار ۽ صحافي مرتضيٰ سيال جو پورو نالو غلام مرتضيٰ ولد در محمد سيال آهي. هن 29 جون 1965ع تي هالاڻي، ضلعي نوشهري فيروز ۾ جنم ورتو.

اديب - ڀاڱي جون ٻِيون داخلائون