ٽالپر مير رسول بخش خان

مير رسول بخش خان ٽالپر : الحاج مير علي احمد خان ٽالپر جو ننڍو ڀاءُ مير رسول بخش ٽالپر ٽنڊو مير محمود ۾ مير حاجي نبي بخش ٽالپر جي گهر ۾23 آڪٽوبر 1920ع ۾ پيدا ٿيو . مير صاحب جامعه مليه دهلي ۽ سنڌ مدرسته الاسلام ۾ تعليم ورتي ، زمينداري پيشو کين ورثي ۾ مليو . مير رسول بخش ٽالپر سنڌ جي سياست ۾ تمام بهادر ۽ مشهور شخصيت طور سڃاتو وڃي ٿو . سندس طبيعت ۾ محبت ، اخوت ، رواداري ، عاجزي ۽ همدردي تمام گهڻي سمايل هئي . سندن طبيعت ۾ فقيري اوصاف تمام گهڻا سمايل هئا . مير رسول بخش صاحب ذوق ۽ علم پرور شخصيت هجڻ سان گڏوگڏ غريبن جو همدرد پڻ هو . حق چوڻ ۽ حق جي ساٿ ڏيڻ ڪري کيس ڪجهه عرصو جيلن ۾ به رهڻو پيو ، مگر پنهنجي اصولن تان ڪين هٽيو . مير صاحب سنڌ جو گورنر ۽ سينيئر وزير پڻ رهي چڪو آهي . سندس درويشانه طبيعت سبب سندس پيارا کيس مير شير محمد چوندا هئا . مير رسول بخش خان پنهنجي سماجي خدمت جي شروعات ٽانگا ڊرائيور يونين ، رڪشا يونين ۽ هارين جي قيادت سان ڪئي . ڪيترائي سال مختلف ليبر يونين جو رهنما پڻ ٿي رهيو . 21 سالن جي عمر ۾ حيدرآباد ميونسپل ڪميٽيءَ جو ميمبر چونڊيو ويو . 1965ع ۾ بنيادي جمهوريت واري چونڊ ۾ يونين ڪميٽي جو چيئرمين چونڊيو ويو . مير رسول بخش 1958ع ۾ عوامي ليگ ۾ شموليت اختيار ڪئي ۽ حڪومت جو نقاد رهيو . 1970ع ۾ صوبائي اسيمبليءَ جي عام چونڊن ۾ ڪاميابي حاصل ڪيائين . 1972ع ۾ سرڪاري حج وفد جي سربراهه جي حيثيت ۾ حج جي سعادت حاصل ڪئي ۽ 29 اپريل 1972ع ۾ سنڌ جو گورنر مقرر ٿيو . 13 فيبروري 1973ع ۾ انهي عهدي تان استعيفا ڏئي ڇڏيائين . 14 مئي 1981ع تي کيس سنڌ جو سينيئر وزير مقرر ڪيو ويو . مير صاحب کي انهن عهدن تي سندس صلاحيتن ڪري فائز ڪيو ويو هو . مير صاحب پهرين مئي 1982ع تي انتقال ڪيو .

داخلا ۾ استعمال ٿيل تاريخون

1920.10.23  عيسوي

مير رسول بخش ٽالپر ٽنڊو مير محمود ۾ مير حاجي نبي بخش ٽالپر جي گهر ۾23 آڪٽوبر 1920ع ۾ پيدا ٿيو

1982.05.01  عيسوي

مير رسول بخش پهرين مئي 1982ع تي انتقال ڪيو .

شخصيتون - ڀاڱي جون ٻِيون داخلائون