ٿرپارڪر ۾ موجود پاتالي پهڻ گرينائيٽ

پاتالي پهڻ (Granite ):هيءُ پٿر بيحد سخت، آتشي ۽ داڻيدار بلوري پاتالي ٽَڪر جو قسم آهي، جنهن جو رنگ خاڪي ۽ گلابي مائل ٿئي ٿو. هن پٿر کي گرينائيٽ به چيو وڃي ٿو. هن ۾ سرخ قلمي ڌاتو (Feldspar)، بلوري پٿر ((Quartz، Mica ۽ Magma جي وڏي مقدار ۾ ميلاپ بعد آهستي آهستي ٺرڻ سان ٺهندو آهي. هي پٿر گهڻو ڪري عمارتسازيءَ ۾، خاص طرح سان اڏاوت جي ٻاهرين سطح کي چلڪائي سينگارڻ لاءِ استعمال ڪبو آهي. البت هن ۾ جيڪو ابرق ۽ فيلسپر جو عنصر موجود هوندو آهي، سو ڪيميائي ڦير گهير جي ڪري موسمي اثرن کي گهڻو اندر وڃڻ کان روڪي نٿو سگهي. سنڌ جي ٿرپارڪر ضلعي ۾ واقع ڪارونجهر جبل ۾ به گرينائيٽ پٿر موجود آهي، جيڪو 40 چورس ڪلوميٽرن ۾ پکڙيل آهي ۽ 1450 کان 1500 فوٽن جي اوچائي تائين ملي ٿو. ڪيترن سالن کان ڪارونجهر ۾ موجود گرينائيٽ کي ڊائناميٽ ذريعي ٽوڙي، ٽرالرن ذريعي ملڪ جي وڏن ڪارخانن ڏانهن موڪليو وڃي ٿو، جتان تراشجڻ بعد ٻين ملڪن ڏانهن در آمد ٿئي ٿو.

پٿر - ڀاڱي جون ٻِيون داخلائون