پارپتي ٽيڪچند، گدواڻي: سنڌ جي هيءَ سماجي ۽ تعليمي خدمتگار نياڻي، 1 جنوري 1906ع تي حيدرآباد ۾ ڄائي. هن جو مشھور گدواڻي خاندان سان واسطو هو، جنهن خاندان انگريزن خلاف آزاديءَ جي جدوجھد ۾ سرگرم ڪردار ادا ڪيو هو. پارپتي ’ڀاڳناڙي ڪنيا ودياشالا ڪراچيءَ‘ جي هيڊماسترياڻي هئي. هن جي اڻٿڪ ڪوششن سان ڪراچيءَ جي اولڊ ٽائون جي ڪيترن ڪميونٽي هالن ۾ ’چرخا ڪلاس‘ ۽ ’کاڌي ٺاهڻ جا مرڪز‘ قائم ٿيا. هيءَ 1931ع ۽ 1942ع ۾ ترتيبوار هڪ سال ۽ ٽن سالن لاءِ جيل ۾ رهي. پارپتي سنڌ ۾ ٻالڪن جي ٻاريءَ جي بنياد وجهندڙن مان هئي ۽ ان لاءِ هن دادا شيوڪ ڀوڄراج سان گڏجي ڪم ڪيو. هوءَ 1930ع ۾ ٻالڪن ٻاريءَ جي صدر ٿي ۽ 50 سالن تائين ٻارن جي ڀلائيءَ ۽ فلاح بھبود لاءِ جاکوڙ ڪيائين. سندس اڻٿڪ ڪوششن سان ٻالڪن جي ٻاري جون سنڌ جي ڪنڊ ڪڙڇ ۾ شاخون قائم ٿيون ۽ ان مقصد لاءِ هن سنڌ جا تمام گهڻا ڳوٺ گهميا ۽ گشت ڪيا.
1906.01.01 عيسوي
سنڌ جي هيءَ سماجي ۽ تعليمي خدمتگار نياڻي، 1 جنوري 1906ع تي حيدرآباد ۾ ڄائي.