پهريون سنڌي عروضي شاعر: سنڌ جي تاريخ تي سرسري نظر وجهڻ بعد خبر پوندي تہ سنڌي ٻوليءَ ۾عروضي شاعري جو بنياد وجهندڙ سيد ثابت علي شاھہ ڪربلائي آهي. سيد ثابت علي شاھہ کان پهرين عروضي شاعري صرف سنڌ جا فارسي شاعر ڪندا هئا ۽ سنڌي بيت ڏوهيڙي ڪافي وغيرہ ۾ هوندي هئي. سيد ثابت علي شاھہ اهو پهريون شاعر آهي جنهن عروض جي فن سان گڏوگڏ مرثيي جي صنف کي بہ سنڌيءَ ۾ متعارف ڪرايو ۽ مرثيي جي فن کان پنھنجي شاگرد ميرزا مراد علي بيگ سائل کي بہ واقف ڪيائين. سنڌي ٻوليءَ ۾ مرثيہ جو پهريون شاعر سيد ثابت علي شاھہ جو ۽ ٻيو ميرزا مراد علي بيگ سائل آهي. سنڌي ۾ غزل جو پهريون شاعر خليفو گل محمد آهي ۽ ڊاڪٽر غلام علي الانا پنھنجي تصنيف ”لاڙ جي ادبي ۽ ثقافتي تاريخ“ ۾ لکي ٿو تہ: ”سيد غلام علي شاھہ لاڙ جو گمنام شاعر، ميرن جي ابتدائي دؤر ۾ ٽنڊي محمد خان ۾ وفات ڪري ويو. هن بزرگ آخوند گل کان بہ اڳ غزلن ۾ حقيقي محبوب جي ساراھہ ڪئي.“ هن مان ثابت ٿئي ٿو تہ سنڌي غزل جو پهريون شاعر سيد غلام علي شاھہ هو. ليڪن غزل واري صنف ۾ اڃا بہ تحقيق جي ضرورت آهي.