پير ڪامل قريشي: پير هارون عرف ڪامل قريشي، عبدالله شاهه گودڙئي جو رفيق ۽ قلندر لعل شهباز جو خليفو هو. روايت آهي ته ڪامل جو خطاب قلندر لعل شهباز کان عطا ٿيس ۽ پير ڪامل لاءِ قلندر لعل فرمايو ته:
’اي هارون قريشي هنوز شما ڪامل ‘شدي‘
يعني: ’هارون قريشي هاڻي اوهان ڪامل آهيو‘. هارون قريشي ڪرامتن وارو بزرگ ۽ اولياءَ ٿي گذريو آهي. عقيدتمندن وٽان روايت آهي ته بڊام ڍنڍ ۾ جڏهن به ٻوڏ ايندي آهي ته ان ٻوڏ جو پاڻي سموري قبرستان کي ٻوڙي ڇڏيندو هو پر سندس قبر پاڻيءَ جي سطح کان مٿي ٿيندي ويندي هئي. هي بزرگ 1282ع ۾ وفات ڪري ويو. سندس قبر ضلعي قنبر شهدادڪوٽ جي بڊام ڍنڍ جي ويجهو سندس نالي پٺيان قائم قبرستان ۾ آهي. هن قبرستان ۾ ان کان علاوه ٻيا به ڪيترائي بزرگ مدفن آهن.