ڀٽو، مولا بخش ”مسڪين“: مولا بخش ”مسڪين“ ڀٽو ، 1909ع ڌاري شڪارپور ۾ پيدا ٿيو. سندس والد جو نالو عبدالمجيد هو. پرائمري اسڪول ۾ تعليم وٺڻ بعد 1909ع ۾ سنڌي فائنل جو امتحان پاس ڪري ورتائين. جيئن تہ آزاد خيال انسان هو، انڪري سرڪاري ملازمت ڪرڻ بدران سول ڪورٽ ۾، عريض نويس ٿي گذاريائين. سندس حياتيءَ جو گهڻو عرصو جيڪب آباد شھر ۾ گذريو. مذهبي تعليم جي طرف توجھہ هئس. روزي نماز جو بيحد پابند هو، ايتري قدر جو، جماعت کان سواءِ شايد ئي ڪا نماز ادا ڪيائين. حياتيءَ جي پوئين عرصي ۾ سڀ ڪجهه ڇڏي، يادِ خدا ۽ لکڻ پڙهڻ جي شغل ۾ گذاريائين.
سندس تصنيفن مان هڪ ڪتاب”حقوق الوالدين “ ڇپجي چڪو آهي ۽ سندس ٻيون تصنيفون بہ مذهبي معلومات جو ذخيرو آهن ۽ دستخطن جي صورت ۾ باقي آهن. اُنهن مان هن” سورة يوسف ۽ ياسين“ جو تفسير وڏيءَ محنت سان لکيو. مولا بخش ”مسڪين“چڱو نثر نويس تہ هو، پر شاعر بہ هو. سندس بيتن جو هڪ مجموعو ” ابيات مسڪين“ نالي سنڌي ادبي بورڊ طرفان گهڻو اڳ ڇپجي چڪو آهي، سندس بيتن ۾ ناصحانه شعر گهڻا آهن. ”مسڪين“ جي ڪلام ۾ پختگي ۽ رواني آهي.
شڪار پور جو هي زندہ دل شاعر مولا بخش ” مسڪين “ ڀٽو، گهڻو وقت بيمار رهڻ بعد 24 سيپٽمبر 1953ع تي وفات ڪري ويو.
1909.00.00 عيسوي
مولا بخش ” مسڪين “ ڀٽو ، 1909ع ڌاري شڪارپور ۾ پيدا ٿيو
1953.09.24 عيسوي
مولا بخش ڀٽو 24 سيپٽمبر 1953ع تي وفات ڪئي